Mkuni Paran
Meniq ka pncbuwan Tanah Tunux daka rudan ta mneniq Paran hii cbeyo we, "Musya ziken（Kari Tanah Tunux：霧社事件／むしゃじけん）” mesa ka Tanah Tunux ma, “Mkuni Paran / Kncyukan Tanah Tunux Paran” mesa ka rudan ta ita Kari Seediq (Tgdaya).
Qlhangan Tanah Tunux ka Taywang nii ciida we, ini na psngai pqeepah ddaun quri ndheya ka Seediq alang ta, so ka smeelu, smmalu hako; mpheyu sapah ptasan ma sapah pyasan de, saanun na paapa qhuni dgiyaq Ucuucik（馬赫坡富士山） dungan. Irih so meyah psqrinuc ita ka Tanah Tunux, asi lux mgedang qqpahan daha ka rudan ta.
Inu dungan, ye tena mhedu mpprengo ka seediq mdudul alang ma, wada daha spooda Gaya ta kmciyuk ka Tanah Tunux di, ani ba knkana pnrrungan daha mesa kari rudan mntngari dehuk alang Gluban hii. Bale ba we, mmteru alang ka knciyuk Tanah Tunux ciida, maha 1300 hei kana seediq na hayan, bobo pnuurung de ini dehuk 300 hei ka mntngari na di.