Weewa skpahung nganguc

Weewa skpahung nganguc

Cbeyo gaya rudan ini mhemuc qmerac weewa. Netun skpahung ka weewa maha mseyang riyung ka tnalaung. asi ta spooda gaya msterung weewa seediq, ma smipaq babuy puqun siyang ka tnsapah weewa. Skpahung ka weewa, uka kari kiya, seediq ini peekan siyang tnsapah pggayung paru riyung ka kiya. Weewa wada so skpahung nganguc nii na, puqun daha siyang ka tnsapah niya, ma ptulun daha puto ka snuunux na weewa duri; dungus na nii ge, asi ini mhemuc musa klaalang mkkesa mesa.

Kndalax ciida, ini mmhemuc ka riso ma weewa di. Spooda daha gaya ka moda msterung nii di. Psterung daha ka laqi cbeyo, saan daha smrai, smruwa ka rudan daha di ge, kika pstrengun daha, so nii ka gaya tngsaan na rudan cbeyo. Netun ini pstrengi ka weewa skpahung nganguc nii, smiling weewa ka tama bubu na weewa, “Ima bale ka rseno kiya?” mesa smiling tama bubu daha, ma weewa nii, ini ba ptgesa ngayan na riso kiya. So nii ka weewa ini bale seeliq ngayan na riso kiya ma, ini mmhemuc rmengo ani mmaanu duri.

Duma weewa ssiqa na ka ndaan so nii, msiqa qmita seediq tnalang, musa naq mssnegun ka riso duri, msuupu mdaadis musa lmiqu, mssnegun mdaadis musa cghuur, uka dqeras daha qmita seediq tnalang peni.