Wauwa laqi mqedin na utux bruwa - Saisyat

Wauwa laqi mqedin na utux bruwa - Saisyat (雷神的女兒娃恩-賽夏族)

Cbeyo ini kela qmeepah yqeyaq ka Saisyat, bobo qnita ka Utux bruwa Piwa de, kii asi plawa madis rehak macu tmgesa qmeepah seediq ka Waun.

Hani meyah bobo dheran Waun ciida de mnetur riso Saisyat Taing, msqita dehya daha asi lux mskuxul, kii asi msterung ka ali ciida.

Mosa meepah de madis mpusan qburung daka kagun ka Waun, ma mnmmteru qapang psaun na kingal ka cceka yqeyaq, mbahang hmrenang paru bluwa kndalax qeyaq ka Taing, ma asi lux mhedu smnetur yqeyaq di.

Niqal dungal, mangal beyax naq Waun wada pkmalu mbudu ka tama na Taing, mqaras riyung ka tama na, ani si osa pure ido ma eniq sapah kesun na Waun ciida de, mesa ka Waun naqah ku tmelung supih ma qyqeya xiluy knii si, pure ido sapah kesun na ka heya, heya daka Taing mosa meepah, ani si wada tikuh ali de, ado ini skpahung ma gmiyak kii wada pkseyang ka heya daka bubu na Taing, ma asi naq osa pure ido hprayan hiya ka Waun, kiya de hmrenang paru mntena ba bruwa kndalax hprayan hiya, mosa qmita hiya seediq tnsapah daha tena uka qtaun ka heya di, wano sngari kingal qhuni blebun runge.

Kela naq mseyang dheya ini kela knhuwe heya ka Waun, klaun na uxe qbsiyaq meniq bobo dheran kii asi osa karac baro di.