Utux rudan

Utux rudan （祖靈）

Netun pskingal bale mesa “utux” ka kari miyan Seediq nii ge maha daha ka dungus na, kingal we utux gmaalu seediq ma, kingal we utux smeeliq seediq. Netun mesa “utux rudan” de, ga pndungus ba tmiyu utux nrdrudan miyan yami Seediq ka kiya di.

Utux ma Seediq（utux與賽德克）

Meniq ka yami Seediq nii peni na, kesun “utux” nii ge niqan pnugluban na pnyahan seediq, kndesan seediq ma nhqilan seediq; ririh so ga rmengo maanu ka snhiyan nami yami Seediq, ga pgkela huwa mesa qqita na karac ma dheran ka yami Seediq.

Hako Utux（神靈之橋）

Niqan miyan kari pnsltudan mesa “Hako Utux” ka yami Seediq, mesa ka kari na: “mhuqil ta de mooda Hako Utux ka utux(靈魂) ta, niqan naq ka utux rudan(祖靈) ta ga qmlahang hii, gneegan na ka mooda Hako Utux mosa dehuk tlangan utux rudan(祖靈之地) ta, meniq ka wada na psgeegan de uxe mooda Hako Utux dheya, kika mugedang naq tuxan mnkuung” mesa. Kiya ka niqan nami pusu snhiyan rudan(固有信仰) miyan mesa “mhuqil ka hei ta, uxe mphuqil ka utix ta” ka yami Seediq.

Utux Tmninun（編織生命的神）

Kari mesa “Utux Tmninun” nii ge, bhangun hari mosa smdehu seediq wada mgedang, drudan mnteme hii mesa “wada yahun mangal Utux Tmninun ka heya di”, ririh ga mesa “niqan nanaq ka utux tmninun kndusan ta ita seediq bobo dheran nii”.

Pteumal pptasun(資料來源)

Tiwas Pawan、Tado Walis、Pawan Nawi、Siyac Nabu ma Robo Pihu ka smneeru Dakis Pawan ka smnnetur