Utux Karang

Utux Karang （螃蟹靈）

Utux Karang daha ka Hako Utux mrrerun hari ka kari rudan nii. Utux Karang nii aliali na meniq Hako Utux hiya, tmara seediq hani mgedang ppooda Hako Utux hiya, maha quri thulang sapah rudan. Moda hi ka seediq de, Utux karang nii ka qmita baga seediq, teta niqan tanah ka baga daha. Niqan de pdaun na mkkala Hako Utux mosa dehuk sapah rudan denu; uka tanah baga na seediq de qrapun na qataq na baga, qdaanun na toma Hako truma, uka braxan mosa sapah nrudan daha ka so kiya. Ki ka yaani niqan so kari hntriyan psgao nseediq ka Utux Karang nii.

Utux karang ga meniq Hako Utux hiya si ka kari rudan. Hmuwa kesun niqan so psgao nseediq ka Utux Karang nii. Anu heya ka niqan beyax moda qmita baga seediq ye niqan tanah mesa. Tanah nii de rireh so ga snuruun ndaan daha bobo dheran, ye mbeyax tminun mqedin, ye ini qbserux smalu lukus, ye ini pkberas hei tnsapah, mege so muuxun ma tdhriq tnsapah daha; so rseno de smneru mesa ye ini kbserux mosa lmiqu, ye mbeyax ka qmlahan alang, ye ini pkuure qmlahan niqan ppqun ka tnsapah na. Kiya ka mqedin mdrumuc tminun ma rseno mbeyax mosa migin ppuqun de niqan tanah baga daha mesa.

Kiya ka ssaan na gmao ka Utux Karang nii, malu naq ndaan na bobo dheran nii, qulun dehuk alang rudan mesa, naqah naq ndaan na de qtapun Utux Karang qdanun na toma Hako Utux hiya, uka na brahan mosa suupu rdan daha mesa.

Kari Utux Karang daha ka Hako Utux nii. Kari bale rudan cubeyo ka nii. Slaqi ku ciida egu hari rudan smneru kari nii nana. Duma rudan rmengo mesa: “Iya tiyu Hako Utux gaga, maha ciwin baga namu denu mesa.” Smukagun ku kingal rudan duri, “Hako Utux de ki ka qntaan ta ka gaga ssiyo karac kiya?” mesa cmiyuk ka rudan kiya: “ado so kiya de, ma ta ini qtai ka Seediq gaga mkukesa hiya di?” Mbahan ta kari daha rudan nii, asi ta klai niqan so ga mslutuc kari ncubeyo ka lnlungan daha.

Tgkingan rudan ga de, wada na pdaun so kntaan ta ka hako utux ga ssiyo karc hika rmengo kiya, kika rmengo laqi, iya tiyu kiya, muwa de so mseyan Utux mesa, maha ciwin baga tnniyu su dhenu mesa. Tgdaha rudan kiya de ini pdai qntaan ta, poda so rriqu hari so ka kari na, kibale ga mesa uxwe ta ntaan ka Hako Utux nii. Ani si Hako Utux nii de gaga naq so dheran uka ta qtaan dungus na. Mntena ka so tmgesa niqan ka Hako Utux, ma Utux karang, gino bale snneru daha ini pntena hari.

Pnyahan pnataas(資料來源)

台灣原住民族歷史語言文化大辭典 http://210.240.125.35/citing/citing_content.asp?id=3726&keyword=%BF%C0%C3%C9%C6F

曾瑞琳，1994，《賽德克族神話故事》，南投：南投縣天主教山地服務研究社。

許端容，2007，《台灣花蓮賽德克族民間故事》，臺北：中國口傳文學學會。