Tmukuy masu
Seejiq sun, niqan egu bi malu endaan rudan sbiyaw, saw ka pstrung ka risaw ni uuwa, psalu kingal bgurah sapah, saw ka phuma masu -- asi ka "smgasuc" meysa utux rudan, pkeiyah egu hiyi masu.
Sbiyaw balay 5 idas do prajing hmuma ni tmukuy masu da, kiya ni muda smapuh hmuma, jiyax siida asi ka mrbu balay tutuy ni phlama hlama masu ssapuh dha, pusu ranaq tahuc sapah o ini tduwa phing, smapuh siida, pusu ranaq nii o sranaq tahuc, dsun ka pnhlman masu ni sinaw ni payay ni parih, dsun dha empsapuh kana ka nii ni dsun dha qnpahan.
Plalay musa qnpahan kingal empsapuh, mangan parih sqbuh na dhgal, smapuh pnhuma, kiya ni meysa snbliqan utux ni taysaw emphru kana ka pnhuma, nhdu smapuh do, hmliq cipiq hlama masu ni spawsa na ska spuhan, hmrig cikux sinaw , mnsngari hlama masu ni sinaw o sugun mkan dha empsapuh. Kiya ni wada musa qnpahan kingal empsapuh duri, wada muda saw uuda spuhax, kika nii o smapuh hmuma sun.
Empitu idas -- prajing tmatak, maxal idas -- mhada ka masu do miing kingal jiyax muda qnburung, knkingal sapah o prajing musa qnpahan kmtuy bnkiyal masu dsun sapah, kingal bnkiyan o qyanun sida qhuni, kingal bnkiyan o phmaun qnpahan, nhdu qnburun do, mangal kingal bnkiyan duri sqaya damux rpun. mrbu jiyax spuhan, seejiq alang o miing dha seejiq lmawa utux, meysa smbliqan, nhdu kana ka smapuh do, smwayay kana ka sejiq, ini tduwa embrinah qmita, manu ka saw nii o kika smapuh kmtuy.
Saw nii kingal hnkawas empxal muda ka smapuh o sprun dha balay, nasi niqan ka smliq gaya ssapuh o, ini sbliqi utux ruda ka pnegalang dni naqih kana ka pnhuma, kiya ni lmawa empsapuh taysaw miyah dmayaw ksblaiq rmngaw utux rudan, seejiq smliq gaya nii o asaw ka psruwa ruciq brah utux rudan, taysaw ssruwa ruciq.
Egu balay ka gaya seejiq wada muungac da, wana ta embahang smmnru rudan tada, tlami lmlung binaw, ita seejiq o asaw ta ka smparu gaya, prtuday ta muda ka gaya ta, tay saw pniqun ta ka rmun rudan, dhuq sayang ana bitaq knuwan.
- 詹素娥. (2011). Wikipedia 維基百科 族語詞條試寫─原住民族語詞條 2011作品集. 教育部.