Tmsamat
Tmsamat (狩獵)
Rudan Truku sbiyaw ana yaa pusu bi kndsan dha ka tmsamat, kiya ka kiya ni mkla bi lmnglung huya ta msa mseupu meudus ka seejiq ni hmnru ida nkiya babaw dxgal nii.Babaw na do maameeqpah dxgal ka pusu bi kndsan dha da. Seejiq Tnpusu Taywang tmsamat o ngalan dha pusu pyahan uqan hiyi, tnlangan Truku ka snaw o musa tmsamat, kuyuh o mmkay sapah kiya.Truku o niqan pusu bi qaya ka musa tmsamat, kingal hngkawas o misan ni(mi) krpuhan yaa bi paah 9 idas bitaq prajing 3 idas hkawas ka mtduwa musa tmsamat,srnabaw yaa bi paah 3 idas bitaq 5 idas o ini tduwa tmsamat kiya,yasa gaga niqan wawa nbuyas ni mtucing wawa ni mdakil.rbagan paah 6 idas bitaq 8 idas o ini tduwa tmsamat, yasa naqih ka elug, niqan quyu ni empsburaw ka samat mtalux karat.Qngqaya djiyun tmsamat o buji, puniq, pucing,xiluy sqslan,smbrngan ni gasil.mseupu musa tmsamat ni taxa bi hiyi ka musa tmsamat, yasa nii o pusu bi kndsan Truku. Musa tmsamat o musa rmuyuk, maduk, qmburang, powsa xiluy sqslan ni powsa gasil, powsa libaw, tbabaw, qlubung, during, dahaw, gayuq rbuq, danger, danger kumay.
Gaya tmsamat o saw nii
[smmalu patas | ida npatas sspgan ka smmalu patas]1.qngqaya djiyun tmsamat o ini bi tduwa tlngun kuyuho.
2. nasi niqan mhuqil, mdurug ni mangal kuyuh ka alang o ini tduwa musan tmsamat.
3.nasi niqan mnarux elug mmowsa tmsamat siida asi brinah miyah sapah.
4. mmha brah na o asi ka psdaran, qmita spi ni qmita sisil.
5. malu qntaan na spi niqan rudan mgay, suyang bi seejiq, musa tmsamat o mha niqan nangal na.Nasi qmita naqih spi, kiya o quyu, ciyaqung, mqalux ngiyaw,rngsux paru,sqama ka rnaaw ni sapah ni wada geeguyun ka pusu bi dnuuy o ini tduwa musa tmsamt, ana musa o ungat ana kingal ngalun na.
6. smtrung sisil ka mkleelug musa tmsamat siida,nasi meuyas mniq narat ni mniq iril han dalih ka emptsamat do skiya ni musa ttama narat ni meuyas hiya, malu ka nii mtduwa musa tmsamat.
7. nasi mniq narat han dalih ka emptsamat do skiya musa ttama iril meuyas hiya da, saw nii o ini tduwa musa tmsamat ki da.
8. nasi mniq iril meuyas o ini tduwa musa tmsamat.
9.nasi mtbbrih brah emptsamat muyas o ini tduwa musa tmsamat.
- 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.