Thuda ciida mosa nami tmlenga

   Kari nii, pneyah na tama mu. Kari so tmgesa ncubeyo ka so nudaan daha mosa tmlenga, So mpqudi hari ka kari nii, ya ani so smraki laqi mosa tmlenga ma pgukela so laqi peni.
 
   Msekuy riyung bale ciida, smnegun ku tama mu egu nami hari seediq suupu mosa dgiyaq. Bsiyaq nami mkkesa, paru bale ka huda ma sbgihur duri, ini kugah kana doriq nami mkkesa ma, uka brahan qmango paru kana ka papak nami, so miyan tnpupu mkkesa, tgkingan ku tguhuda ma, sbgihur paru meniq dgiyaq hiya. So kingan nanaq lmngelun ka ndaan ciida.
   Ciida, ani miyan nanaq bsiyaq mkkesa, ani kkingan uka bale ka mnangan nami. Lmngelung ku naq duri, yaani maha uka ngalan ta saya mesa ku. Kiya hari de, qnbahan miyan gaga lmawa mesa “uwo~ uwo” ka seediq gaga berah miyan. Wa  Niqan da ! mesa ku lmngelung. Tmalang miyan mosa berah hiya, ga tmgutu berah hiya kana ka seediq. Mosa ku kmuuro qmita hiya, ketu bale knparu urung na “maanu  kiya,” mesa ku. Kelaq naq urung rqenux paru gaga tdoruy hiya, muqaras kana seediq qmita rqenux kiya.
   Dmudun qpahun ka tgkingan seediq mnita rqenux kiya. Osa mtahu han kesun n aka duma, sapo kapa duma mesa, ima ka osa skadi tikuh qhuni pthuun mesa ma, bubun ka duma mesa. Kika sqeya daha urung na paru hiya ka qyuqeya nudoi daha baga, niqan so puqan ma, lubuy ma, tokan bale ma, pala ma, hlmadac biciq duri… 

Ini bale kupiya ka patis hido! Paru bale ka puniq snqama daha puniq, asi texan so muuxun bale kana ka hei. Kiya ka asi stxan bale, asi spilo ka rqenux kiya ma wada mesa “kiring kryang ! kiring kryang!” smnegun rqenux kiya ka qyuqeya daha. Ani naq mesa puqan mu! Pala mu! Iya desi mesa, uka brahan da, wada desun kana di. Kiya dehuk hini ka kari na tama mu di.