Terebi

Pnyahan Wikipidiya
跳至導覽 跳至搜尋
Terebi (電視)

Terebi(電視)[smmalu patas | ida npatas sspgan ka smmalu patas]

Bale ba we, uka miyan kari kesun Terebi ka yami ma, kanna so qyqeya bnarah zi-dai hndure nii duri we, uka kari miyan yami Seediq duri, meniq ka kari nami mesa Terebi nii di we, kari Tanah Tunux ka kiya. Kndalax yahan nami na qmahang Tanah Tunux de, egu riyung kari miyan saya ka asi puuyu kari Tanah Tunux di, ani si, uxe wano kari Tanah Tunux pyuun, niqan kari Plmukan duri ma, yaani niqan ka kari Kahabu duri, ani si ,ga nami ini kela pusu na duma di. Ma bobo na wada ka Tanah Tunux de, Telu ka meyah smriyux kmlahang yami dungan, kika kari miyan saya de, ga mpgimax kari Telu duri di.

Yaani ba muuyas ku syo-cyu hari de, prading niqan ka seediq alang miyan Gluban maruy Terebi di, ani si ini kpiya sapah ma, kamoku Terebi ciida ge, kingal bale Tai-su, ma mgbhege qalux qtaan, uka rako. Ani naq so kiya we, kuxun riyung qmita seediq alang, so ka tnsapah ini dehuk maruy Terebi ge, mosa tsuusuy qmita sapah seediq niqan Terebi, mhuwe riyung ka seediq niqan Terebi duri, asi daha psai nganguc ka Terebi daha ma, msuupu qmita nganguc hii kanna seediq ma, madis naq gakac tlloongan daha. So smhulis ka qtaan Terebi de, mhulis naq seeediq qmita hii duri, lmingis na qtaan Terebi de, tsrusuq naq naq duma ka seediq qmita hii duri, bsiyaq qtaan daha Terebi hii de, slleung ka duma rudan di. Betaq ba mhedu kanna kamoku Terebi, qmita hii duma seediq, ani so kiya ge, ini kesa mmaanu ka seediq tnsapah niqan Terebi, malu mu bale lnglungun ani betaq saya ka, ndaan so kiya.

So ka sapah me yaku we, betaq ku meyah mgsense Hori de, snpuwan miyan maruy yami ka tama bubu mu ma, maruy nami ping-syang duri, ciida de tena hbaro bnaruy Terebi ka, seediq alang miyan di. Ma teru ka Terebi ko-si ciida di, niqan rako qtaan ka Terebi duri di. Ani si, ini keegu riyung ka, kamoku na dungan, mrengo sinbung ma ren-sici ka kuxun na qmita rudan, riso weewa ge smkuxun qmita muuyas ma sinbung, laqi ge smkuxun qmita ka-tong, ncugin theyaq qmita laqi duma ka rudan daha.

Saya dige, kndudul egu ka ko-su Terebi nii di, rmabang egu ka kamoku na duri di, asi lux ini pnklai qmita, tnkaxa ma sncaman niqan kamoku daha, ini ksange. Malu ka egu ma mnllamu kamoku Terebi, ani si niqan ka naqah qtaan laqi de, kiya si skdaka na se-hu daka tama bubu laqi, so ka smneeru ooda naqh peni. Niqan ega, niqan gnbaruy qyqeya, niqan ka weewa uka lukus duri. Kika nasi huwa kesi psaanak ka qqtaan rudan, qqtaan riso ma qqtaan laqi ge, naka bleyaq rmengo ka se-hu ma, smnegul ka ko-si Terebi, meniq ka ini thei na we, naka spooda ho-ricu mseru.

Ani maanu ka ha-tacu saya di, ani alang bukuy rcilung ge, so hari ga asi eniq uyung sapah ma, ani kari mmaanu ka, slhayn klaun daha laqi saya, qrasun ta ka so kiya. Ani si, ado ta ini khbaro ka ita Seediq, kika ani laqi ta naq ita Seediq de, uka riyung mkela rmengo ka laqi ta di, nii si naka ta psaun kcahun ta ma, pspuun ta lmngelugn.


Pnyahan pnatas(參考文獻)[smmalu patas | ida npatas sspgan ka smmalu patas]

  • 郭明正. (2011). Wikipedia 維基百科 族語詞條試寫─原住民族語詞條 2011作品集. 教育部.