Slhayan Smbu Hidaw

Slhayan Smbu Hidaw (射日)

Sbiyaw balay babaw dxgal o wana keeman nanak ni ungat jiyan. Kiya do kndsan seejiq o mqraqil balay ni ini krana saw sgealu. Kiya do o musa pthriq harung ni kika sprdax dha mmkay sapah ni musa mmiyak. Niqan kingal jiyax, 2 hiyi snaw o musa qmpahan ni mhhiru, asi lu strung bgihur mtgnuwin ni wada pskyaun bgihur ka 2 hiyi nii ni sqapah karat do maa 2 hidaw,  2 hidaw nii o mssriyux mnkala ni priyax ryaxan hidaw, wada rmiyax ka kingal han o mnkala ka kingal duri.

Kiya do ungat keeman ni jiyan kdjiyax da. Saw nii thdagan 2 hidaw kdjiyax ka babaw dxgal do mdngu mhuqil kana ka uqun ni pnegalang pnhuma seejiq. Kiya do ungat uqun ka seejiq ni mrana mhuqil.  Duri o yaasa ungat keeman ni ini tduwa msangay ka seejiq uri. Kiya do empprngaw kana ka seejiq alang ni ima ta ka mowsa smbu kingal hidaw gaga, mkksa. Mkmusa kana ka rudan, risaw ni mtrajing risaw, kiya do 2 rudan, 2 risaw ni 2 mtrajing risaw ka musa. Tqrian dha 2 tutu djima lqling ka buwax masu, spqaya dha birat ni madas mami daun dha mkan mkleelug, qnqan dha mami ka buut na o ciyan dha rmbung. Yaasa thiyaq ka pusu hidaw, rudan ini dhuq, risaw ni mtrajing risaw ka dhuq hiya. Kiya do dhiya nii ga, prajing psramal msbu hidaw, sgnama dha ka 1 hidaw siida,wada dha psaun ka buji dha o kmaxan dha, wada priyax ka kingal ni sgnama dha tmaga ka kingal duri, prajing sriyu ka 1 duri hidaw siida, asi dha psai ka buji, kiya do slgan dha smbu kska na ka hidaw ni msqugu quri karat ka qpuruh dara o maaidas, lupus na o maapngrah, mtucing ka qpuruh dara o maatasil, lupus na o maaqahur, saw nii ka idas, pngrah ni kana btunux o nirih dara Truku. Paah siida do kingal ka hidaw, kika niqan keeman ni jiyan. Kiya do tgblaiq meudus ka Truku uri da. Embrinah miyah do, nrisaw o ini dhuq sapah wada maarudan, mtrajing risaw ka dhuq sapah ni tqjiyan knrudan ni crowmaw qnita dha. Mami o mtqaraw ka knrudan. Qmita kana ka alang o yaa ima ka dhiya o ini dha klai da, rmngaw ka dhiya, yami ka mnsa smbu hidaw ni nii nami dhuq sayang da. Kiya do qrasan dha smtrung.

pnyahan kari

太魯閣族語教材 秀林鄉公所2006

秀林鄉志2006