Sita Duku
Sita Duku (希大督固) Niqan 1 wauwa Truku alang ebung daya seuxal, Sita Duku ka hangan na. Kiya ni niqan kingal risaw hmut smkuxul hyaan, Wilang Kurul ka hangan na. Kiya ni “Wada mu ngalun ka Sita Duku da” msa hmut smalu kari ka Wilang Kurul nii. Embahang ka Sita Duku siida, “Ima bi kida, ungat bi saw nii ka yaku” msa ni naqih balay kuxul na ka Sita Duku. Kiya do pgaya ka Sita Duku ni pshada peekan na kana seejiq alang. Kiya ni psteutux kingal rabi, malu pnsttuxan na ka Sita Duku ni smbeytaq pucing mtutuy mha mdkrang ka hiya. “Nasi balay bi wada ku mnaqih ka yaku o aji ku empdhuq embrinah sapah” msa hmici kari. Dhuq balay alang pais keeman na siida , sriyu paah sapah mlatat ngangut ka 1 seejiq ni musa phrinas. Siida, hmgluq puciing ka Sita Duku ni “tak” slapan na waru ka seejiq nii, “pais, pais” msa ka seejiq tnealang ni qduriq ka Sita Duku ni musa sqapah knuruh sapah. Mhraw ka duma ni mhiyug ngangut kana keeman siida, “pais, pais” msa empprngaw ka dhiya. Mhhiru wada mhraw ka seejiq siida do dmuuy pucing ida ki dara ka Sita Duku ni ptbukuy smnegul dhyaan. Mnda tjiyal guyuq ka hiya ni mtki mksa. Emptaril yayung ka Sita Duku o spwaela na qmada sipaw yayung ka pucing na thiyan dara ni mtaril yayung ka hiya. Kiya o pgkla na sjiqun balay bi gmnaliq pais. Jiyax saw saman jiyun na ka pucing na ni, “Wuy! Wuy!, Tai! Tai! yaku, mnsa ku gmaliq pais!” msa mkeelug muyas muda alang ka Sita Duku. Embahang kana ka seejiq siida, “ma balay , ma balay ka Sita Duku”. Kiya do saan dha smtrung, saan dhapsping ka Sita Duku. Siida ka pnspingan Sita Duku o rmabang balay knsyangan taan. Embahang saw nii ka Wilang Kurul, aji hmut siqa na ka hiya. Yasa wada hmut mqbling marah smalu kari ka Wilang Kurul nii hki.
pnyahan kari
[smmalu patas | ida npatas sspgan ka smmalu patas]- 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.