Sisil

Sisil （靈鳥）

File:Alcippe morrisonia.jpg-Sisil （靈鳥）

Sisil ga ida spruun bi qmita drudan Seejiq sbiyaw, mmowsa lmiqu tmsamac siida ka dsnaw alang o, ida hngak sisil ka qbhangun dha balay, ida sisil ka sqita dha balay kata mmowsa inu? Y asa ririh utux ka sisil ksun.

Sbiyaw balay han o ida llbu balay ka karac, sdalih balay dxgal ka hidaw ni mcilux balay ka karac. Qduriq ni mliing ruwan lhngaw ni kska bling katu ka sejiqun. Siida seejiq ni qduda o ida msdangi balay, tduwa mpprngaw kari. Niqan kingal jiyax, seejiq ksun ga wada asi uqi kntlxan karac, kiya ni musa miing qduda. Tai saw tduwa na hqulun baraw hari ka karac, tai saw uxay ktalux ka karac, uxay ptliing kska mnsmug mliing ka seejiq, qduda o tduwa mskaya karac uri. Embahang kari seejiq ka qduda do lmnglung balay, “ida mriqu balay ka saw nii, uxay ta bi dhqun muda ur”.

Phlisan bi dciyaqung ka seejiq, wada mshungi gisu ta msdalih balay hidaw ka ita sayang. Siida wada asi uqi kntalux hidaw ka dciyaqung, kiya ni kasi qqarux qtaan ka ubal dha, ana dhuq sayang mqarux qtaan ka ubal cyaqung, paah hiya siida naqih bi qtaan seejiq ka dcyaqung. Siida niqan ka ksun“sisil”na qduda o kasi skingal bi dmayaw sejiqun, mskaya wada karac baraw mquri nniqan hidaw, mskaya ni wada pkla lnglungan sejiqun brah Utux, ini kiisug kntalux hidaw. Qmita pahung sisil ka Utux do wada asi khnuk ka lnglungan na, kiya ni skgulun na “Usa baraw hari ka karac”. Paah hiya siida, wada ngalan mnkla kari Utux ka sisil, hiya ka pusu balay mnkla euda sejiqun hici da.

Pxal, egu qduda ga mseupu kana mssli kana, pspung biyax dha kata ima ka niqan paru bi biyax? Kiya ka pspung smikul paru tasil, kata ima ka tduwa ptrutu paru tasil? Plealay smikul ka tkurih, qmita paru balay tasil gaga, klaun na nanaq yasa uxay na bi smayun smikul do wada asi alax da. Kiya ni egu balay ka qduda o miyah pstalang smikul ni ptrutu paru tasil nii kana, ida ini dhuq kana ka biyax dha.

Duri ni kingal ka rhu miyah smikul iyux bi ptrutu tasil paru uri, cipiq bi ka gnlgan na. Hici do miyah smriyux bukuy ka sisil, ida dha phlisan balay,yasa cipiq bi ka hnyigan na, ida kmsikul balay paru tasil nii. Sisil o paru bi pahung na ini na bhangi ka hulis dha ni paah baraw mskaya, mndha rmngac ka sisil do wada mquri tasil paru hiya, wada na dtugun smikul ka paru tasil da. Kiya ni wada asi sklui qmita ka trutu tasil nii. Paah siida snhiyun dha balay ka knkla sisil nii, paah siida wada dha snhiyun balay bi niqan ka biyax ka sisil nii.

Pnyahan pnatas(參考資料)

詹素娥 Lituk Teymu