Seejiq knsrabang

Seejiq knsrabang

Sbiyaw seuxal ka ita seejiq Truku o malu bi pnegluban kana karat ni dgiyaq. Siida o ini usa dmaduk dgiyaq ka ita Truku uri, yasa paru bi lupung seejiq ka dmsamat hki. Nasi kmkan hiyi bowyak ka ita seejiq o tduwa ta mniq kiyig truma dgiyaq ni mlawa, “ Lupung mu bowyak, kmkan ku bi hiyi btriq su ur! ” msa do ini qbsiyaq, tmabuy paah dgiyaq hiya ka bowyak. Mhulis ni wada muda brah seejiq nii ni rmngaw, “ Ana bi rabang wah! tduwa ku mgay uqun munan. ” msa. Babaw mnhdu rmngaw malu bi kari nii ka bowyak nii da o mhulis ni tgseesu tmaga. Siida, seejiq nii do mangal pucing ni knhuway bi mangal bilaq hiyi btriq. Ana yaa sdara ka btriq bowyak o ini ksa akay ni malu nanak duri. Babaw do mhulis rmngaw duri ka bowyak, “ tay saw mha namu mqaras ni mttuku bi mkan 1 ruwan sapah namu, swayay ta da.” msa. Mnhdu rmngaw kari do madas emttuku ni mqqaras lnglungan wada dgiyaq duri. Mangal bilaq hiyi btriq bowyak ka seejiq nii da o niqan balay lnglungan na ni thmuku mqaras hyaan, Kiya ni tmalang wada sapah na nanak. Dhuq sapah do jima gaga mnhdu psramal rqda ni kana djiun ka kuyuh tmpusu sapah nii da. Kiya ni lwanan na kana seejiq ruwan sapah ka tmpusu sapah nii ni plealay mgay qnaras Utux, duri ni mhkun na 1 hpuyan nabi ka bilaq hiyi btriq bowyak. Babaw 1 tuki sngari do asi lu thngay 1 nabi ka hiyi btriq bowyak. Ana saw ni skliyun bi lmnglung ka uuda nii o ida dha klaun paah gnaalu utux ka nii. Ungat ixan ka malu jiyax o asaw knsrabang lnglungan seejiq ni ida aguh musa. Siida o niqan ka pusu bi mdawi ni ungat qpahan ka 1 risaw. Yaa mqsuqi hrpasan ni mnmahan na da o kmkan bi samat. Kiya ni ida murug uuda rudan ni wada kiyig truma dgiyaq ni mlawa, “ wi! Lupung mu pada, kmkan ku bi hiyi papaq su ur. ” msa. Ini qbsiyaq do gaga sriyu brah na hika pada. Rmngaw hyaan ka pada, “ Ana bi rabang tduwa ku pkan munan. ” msa. Kiya ni gaga mhulis tmaga siida ka pada nii da o jima wada thngayan “ knsrabang ” ka lnglungan na da, yaasa saw rmanang hari qtaan ka pada nii. Kiya ni siida do mangal pucing ni asi na slapi ka bukuy narat papak na. “ Akay wah! Akay wah! Saw nii mjiras lmingis mlawa ka pada nii. ” Mlatat ni ini rngaw ana manu kari ka pada nii ni asi lu dhuq ququy dgiyaq. Mjiras msaang rmngaw, “ Yamu seejiq ni yami dmsamat o paah seuxal bitaq sayang o pgealuk bi ni pddayaw bi uri, hmuya su ka isu, ma su ini pdhuq pgleelug uuda rudan su hug? Paah sayang yamu seejiq o, asi ka mnda brax namu ni knkla namu ni rbuk namu ni knuudus namu do kika tduwa namu mangal ni mkan samat. ” Asaw knsrabang lnglungan pusu empdawi risaw nii, bitaq saw nii ka kndsan knkla tmsamat ita Truku sayang. Ana saw kiya o iya ta bi shngii ka uuda seuxal ni gaya ta Truku.