Seediq Bale

Seediq Bale (唸法)

Seediq Bale (賽德克族)

Seediq bale ge daha kari ha, “seediq daka bale”, ma daha dungus na ka “seediq” duri, kingal ge tnngayan naq nngayan miyan yami Seediq, meniq ka kingal ge, seediq naq so rrngagun ta klaali. Kika netun mesa “Seediq ku ka yaku” we, seediq tnkari nii ge tnseediq nami yami ka kiya, ani so nii we, uka ka knesa miyan uxe seediq ka kanna seediq ga meniq bobo dheran nii, niqan naq tnyanan miyan duma ka quri dheya, asi ka seediq uxe qtaan rudan nami cbeyo we, uka nami naq ngngalan ngayan. Bale ge, bale ba bale ka dungus na kiya,

Smkuxun mesa “Seediq ku bale”, “Seediq miyan bale” ka seediq miyan yami, mpneyah kari nii ka mesa “Seediq Bale” nii, yaani niqan tikuh ka sntdahu na quri yami Seediq ka kari nii, niqan so pkuuro ma smparu peni. Ani si niqan kari nami mesa “sama bale”, “qcurux bale” ma “huling bale” duri, netun kingal bale ka “sama bale” de, ye sama mberiq ka duma sama di? So kia ka “qcurux bale” ma “huling bale” duri, ye maha niqan ka qcurux mberiq daka huling mberiq duri denu? Speeyah ta pusu kari kesun “bale” nii lmngelung de, uxe ba puso kiya ka, dnngusan na mnugaya kari so nii.

Bale ba naq cbeyo duri, ini kela mhuma sama ka rudan miyan cbeyo, asi naq tikuh skadi sama hmneru so bbsuring ma llmiqu. Kesun “sama bale” nii ge, sama leexan skdiyun ma, kuxun riyuna meka seeidq nami yami, so kiya ka “qcurux bale” nii duri, asi eniq so yyayung ma rruru kssiyo alang nami, ini baka mosa tmremux seediq alang, mnngihun hari mahun ka begu na, kuxun riyung mimah seediq nami. Meniq ka “huling bale” ge, huling mtduwa ma mkela riyung mhero camac, heya ka lekuh rudan nami mosa lmiqu cbeyo, uka huling de yaani maha rriqu gmcamac ka rudan nami cbeyo, kiya kesun daha “huling bale” ka huling mkela mhero camac, irih so snpruwan qmita dnyagan na yami seediq. Huling ka ini riyung osa phlingun we, ini huwa de qmlahang tikuh sapah, ani si, ini nami kesi “huling mberiq”.

Hdure nii de, ga daha hii ngalan muwa ngayan ega ka “Seediq Bale” nii di, riso Plmukan kesun We-tosung ka pnsuega na, dungus na ge, ga pseega ndaan na rudan miyan cbeyo, kika ndaan daha kmciyuk Tanah Tunux peni. Ndaan ga na srunuun pseega nii ge, bnhangan na kari daha, uxe de qntaan patis ma, heya naq mnatis ka kari wada na spooda ega nii di. Egu riyung ka seediq mnosa dmayo pseega heya, niqan hay-yu Tay-wang nii, niqan hay-yu Tanah Tunux, hay-yu Plmukan ma, hay-yu pnslhayan na yami Seediq, hbaro ka meyah tnnais so pseega hiya duri. So ka dmnayo ooda qqpahun ega nii duri we, niqan mneyah Tanah Tunux, niqan mneyah Co-sen, Tay-riku ma mneyah naq ita Tay-wang hini. Ado ka kari nami Seediq ka ga srengo na ega nii, kika yaku ka splawa na mosa mbahang kari daha pseega, ani hay-yu hay-yu Tanah Tunux, hay-yu Plmukan ma, hay-yu ta ita Seediq Tay-wang hini, asi ka tgsaun kari miyan Seediq kanna daha, wada ini pttuku knkela daha duma, ado uxe tnkari kari nami yami ka dheya kiya. Ciida we nyahan qmlahang Tanah Tunux ka, alang ta Tay-wang nii han, ye wada ini pgkela Gaya ma, scuqi psqrinuc quri yami Seediq ka Tanah Tunux nii, mseyang bino rudan miyan Seediq ma, mtutuy ka riso nami mmteru alang, wada daha spooda Gaya lmaqi ka Tanah Tunux. Mkdaha idas pncbuwan daha alang nami qrquri Paran hii, inu dungan, wada mdaadis hei pnrungan kanna daha ma, mtngari teru kbekuy ba ka, seediq mmteru alang nami knciyuk Tanah Tunux di. Niqan niqan sapah skiya, niqan halung paru, niqan halung tpetak ma supi uka qqlengan smepu ka Tanah Tunux, kika wada miyan na ini baka mccebu. Mhedu mccebu de, ye wada mkrima hari idas ka, psliyan na qmlahang alang Drodux ma, alang sipo Suku hii ka rudan nami, ma stheruy na alang Gluban di, Kawa-naka-zima mesa ka kari Tanah Tunux.

Niqan kingal qbsuran alang nami Seediq Mehebu hii ciida, Mona Rudo ka ngayan na, heya srengo riyung na Tanah Tunux, Mona nii ka pnstotuy pncbuwan nii mesa ma, ga daha asi pskngali quri Mona nii ka pusu pncbuwan nii duri. Bale ba we, nniqan naq qbsuran daha ka, alang miyan mmteru knciyuk Tanah Tunux nii ciida, bobo mnccebu de, ga asi pskingal Mona Rudo ka kari daha di ma, ini rrngagi ka duma qbsuran wada kndaadis hei daha mccebu di, irih so uka ngngayan di peni. Kanna ka nnqbsuran alang mmteru knciyuk Tanah Tunux nii duri we, egu ba ltlutuc daha ma so ddadan daha, ga meniq alang miyan Gluban hii saya nana, kika lnglungun ta de, netun so mskingal ba Mona Rudo ka, srengo daha ndaan kmciyuk Tanah Tunux rudan miyan de, maha mesa ma ini pnstaani qmita ka duma daha denu. Kesun “Seediq Bale” nii ge, seediq mbeyax kmdakan alang ma, dmoi Gaya nami yami Seediq, ptbale ndaan alang ma, gmaalu seediq alang, ini sneeru oda naqah ma mbeyax dmudul seeddiq alang, iya ba tgqui mngeung ka kesun nami “Seediq Bale” nii. Kika ga na spooda ega We-tosung nii we, ye mpkesa kiya bale ka, rudan miyan saya yami Seediq di we, maha traun kari daha de qmnita ega kii bobo na di. Ani si, malu spooda ega ka ndaan rudan nami mesa ku naq lmngelung ka yaku, niqan so ga na qnquun we, maha ta spuun lmngelung ka kiya denu.

Pnyahan pnatas (參考文獻)

• 郭明正. (2011). Wikipedia 維基百科 族語詞條試寫─原住民族語詞條 2011作品集. 教育部.