Sapah Pyasan Mu Dgiyaq(我山上的學校)

Sapah pyasan mu dgiyaq, malu bale qtaan ,malu bale saan muuyas duri, niqan mptgesa ma niqan laqi muuyas duri, msuupu muuyas ma mtheyaq sapah pyasan klaali, kiya ka smkuxun nami mosa sapah pyasan klaali. Sapah pyasan mu dgiyaq ge, ga alang nami Seediq, yami llaqi muuyas we pneyah nami alang ma ssiyo neepah na hiya. Kika duma nami we mkkesa naq mosa sapah pyasan, duma nami we taapa nami rulu paru mosa sapah pyasan, uxe so kiya de tpaun nami rulu tama bubu miyan mosa sapah pyasan. Dehuk nami sapah pyasan de, tena ga mheyu rhengun sapah pyasan ka mptesa tmara yami meyah muuyas, msterung nami hiya kanna ka laqi muuyas duri di.

Kiya ka mqaras ku ba mosa sapah pyasan klaali. Sapah pyasan mu, egu klegan ka qhuni ga kssiyo sapas pyasan mu hiya. So ka qhuni dara, dehuk pgmisan de knpriyux qtaan ka waso na denu, duma waso daha we, wada asi knpriyux so mceas qtaan. So ka qhuni snegin we, dehuk smrabo de mphepah kanna denu, so ba qsiya mtanah rcilung qtaan ma, so ba mbbhege rcilung qtaan.

Kika hbaro ba seediq meyah sapah pyasan mu, meyah psasing ma mkkesa, yaani wada malu ba qtaan ma, ye wada malu ba sknexun duri ka bgihur hiya. Ssiyo sapah pyasan mu we, egu ba klegan ka phepah ga hiya duri, theyaq yami smluhe. Niqan kingal glahang ba speriq mtbale ka ssaan nami theyaq ma msseli klaali.

Seediq pneyah alang icin ka meyah qmita sapah pyasan mu de, rmengo ba kanna “kedu ba knmalu qtaan ka sapah pyasan namu nii! sraun misu bale!” mesa tmdahu rmengo. Qrasun mu bale meyah ku muuyas sapah pyasan hini saya. Meniq ka ptgesa yami laqi muuyas sapah pyasan hini we, hbaro ba ka Plmukan, niqan kingal ka Seediq ma kingal ka Paywan duri, dheya ga mdrumuc ba tmgesa yami, sbleqan nami daha bale duri. Sngayan ali sepac we, niqan kingal ka mptgesa meyah tmgesa yami kari Seediq, kingal ka mptgesa kari Tayan ma, kingal ka mptgesa kari Bunun duri. Ali nii, mprengo nami kari nami nanaq.

Pusu mdudul sapah pyasan mu ge, mbeyax ba dmudul psluhe kari Seediq quri yami laqi muuyas, kari Bunun, kari Tayan ma kari Plmukan duri, heya ge Seediq bale duri, tdhurun na bale ka ndaan rudan cbeyo. Rmnengo “iya ba chngii ka ndaan rudan ta cbeyo, niqan ta Gaya malu ba ka ita seediq, asi ka ini kmhemuc, knbeyax muuyas ma qbhangi ba ka kari tama namu ma bubu namu”mesa。

Laqi muuyas sapah pyasan mu, niqan nami mmsepac kmxalan rima hei, mggaalu nami kanna ma, mddayo nami klaali duri, so nami kingal tnsapah, so nami mtswai. Muuyas nami sapah pyasan, egu ba klegan ka slhayun nami, so ka kari ta Seediq ma ndaan rudan ta cbeyo, so ka kari Amerika, muuyas uyas ma kmeeki duri, matis pptasun ma ani naq spatis hiya ka lnglungan ta nanaq duri.

Yaku, meyah ku muuyas sapah pyasan so nii, qrasun mu bale, sgaalu mu bale ka ga mu thiqan muuyas sapah pyasan mu. Tdhuun mu bale ka mptgesa sapah pyasan mu duri. Kika yaku ge, sgaalu mu, qrasun mu bale ma, tdhuun mu bale ka sapah pyasan mu.