Sama watan
Sama watan(昭和草)[smmalu patas | ida npatas sspgan ka smmalu patas]
Alang dgiyaq ga ida niqan egu klgan spriq, tduwa dmatun nhapuy uqun. Kana dha ga, niqan kingal ka spriq “sama watan” ksun, yasa saw bi tunghaw sknxan mkan, kiya ni “tunghaw lmiqu” ksun sejiqun sayang, niqan kingal na ka hangan na “spriq Cawhe” ksun.
Seuxal rabu wasaw na ka dmatun ta idaw meekan. Yaasa ana saw siyaw leelug, qnpahan, ida qtaan gaga mhru nanaq hiya ka“sama watan”, kiya ni dmatun mkan nhapuy kdjiyax.
Tduwa uqun kana ka hniygan spriq nii, ini tmphpah na o ida malu bi skanan wah! Snqtan rabu wasaw, uxay uri o kana ka qmuru na, gmaxun anay qowsul cmsiyux, uxay uri o gmaxun siyang cmiyus, mtna bi tunghaw skanan.
Smnru ka rdrudan o niqan ka kingal seejiq Watan ka hangan na, hiya ka plealay bi smnlay sama nii, tduwa uuqun msa.
