Rqeda

Rqeda(能高山)

Rqeda (能高山)

Ma daha kesun Rqeda ka dgiyaq nii ge, so nii ka kari pnsltudan na rudan miyan yami Seediq Tgdaya : Cbeyo bale hayan si ge, mnsrnecux paru texal ka bobo dheran nii mesa, mnkala alng ka rnecux qsiya paru ma, bungan na kanna llmiqu ma bnbungu, kika mquri dgiyaq kesun Rqeda qduriq kanna ka seediq. Ado ka dgiyaq ba paru ka kesun dgiyaq Rqeda kii, wano ludux keruc na dgiyaq kii ka ini dheki snrnecux mgcilung paru mesa. Ye wada mkpiya ali qndriqan daha meniq ludux dgiyaq Rqeda hii ka seediq ciida ma, mprengo ka rudan snuupu meniq hiya. Mesa:「Ye ta gisu kseengan na Utux, huwa ta pkesa ka so nii ta di ?」mkkesa. kiya , giyas tama rodux daka bubu rodux ka, pllayun daha mqada qsiya paru snrnecux hii, ma spcelaq na siyo rcilung, ini keeih ka qsiya. Kika giyas balas babuy daka giyas gipu babauy ka sqada daha di, ida naq hii kiya ka qsiya snrnecux nana. Ye daha uka bbrahang di ma, miging riso so hrwaling ma mdheriq mnangal tunux pais, daka weewa mbtunux mkela tinun miri di, staapa daha btuku ma pdesan tubu ka dheya daha nii, psaun daha bobo rcilung paru kii, bale wada kmdudul meelih ka rcilung paru snlcingan rnecux kii di. Ma knmalu bale ka hrernang tnubu daha wada mquri snlihan rnecux paru.

Meeih ka rcilung snrnecux kii de, hmeruc kndalax dgiayq Rqeda kanna ka seediq qnduriq hii di, ma meyah mita alang daha. Dehuk ririh so nn-rhengun alang daha de, uka ssapah di, breenux bnaquy kanna nn-alang daha kii di. Ma niqan ka kingal baki rudan ma qudi kanna tunux na, ga mnama mhido qcurux hii, ma tena egu riyung qcurux mnlamu ga na sphido hligan na hiya. Smiling heya ka seediq mkdalax dgiyaq Rqeda :「Mneyah su inu baki ?」kesun daha, cmiyuk ka baki kii :「Mneniq ku naq hini wa, tuubung ka btuku truma ka meyah rnecux paru, …」mesa. Mklui ma melux mqqita ka kanna seediq mbahang kari na so kii, ma mesa ka baki kii :「Asu kanna namu ka qcurux pnhdagan mu nii, maha namu bsiyaq hari uxe psdiyan ppuqul namu knii han, kika lamu kanna ka qcurux ga namu taan berah namu nii, knmani dmengu ma seku, lhlingi mekan betaq smdiyan namu ppuqul,…」. Bobo smneeru kari ndaan daha srnecux paru nii ka rudan miyan Seediq Tgdaya de, teru dgiyaq a nsaan daha qduriq srnecux paru ciida mesa, so hari teru papak rqeda hprayan ta qtaan ma, bale mtteru mheyu hii ka dgiyaq kii mesa. Kiya ka, ani betaq saya de Rqeda kesun daha tmngayan ka dgiyaq kii di.

Pnyahan pnatas(參考文獻)

• 郭明正. (2011). Wikipedia 維基百科 族語詞條試寫─原住民族語詞條 2011作品集. 教育部.