Quri ptasan dqras（關於紋面）

Sbiyaw seuxal Truku o mniq dgiyaq ni mhuma masu ni sari ni bunga ni sqmu. Rahuq na jiyax pnegalang hiyi qhuni do musa powsa gasil ni maduk dha samat, uuqun kuyuh ni lqlaqi dha. Kndsan Truku sbiyaw sexual o mtdgiyaq ni mkbbuyu ni mkeiayug miing uqun dha. Truku o tnsamat balay. Saw snaw Truku o mkuy pucing hwinuk ni mapa buji ni aga. Ttalang mhraw samat ska bbuyu ni rnaaw, yasa embrax bi ka dowriq dha ni tgluhay balay sun maduk. Ga ska dgiyaq hiya o htngayan katu dowras ni lala bi hrus ungat ddaun. Manu saw kiya do mtdgiyaq ka seejiq o asi ka mmanang bi qbubur na ni mgkala seejiq ka rmun dha. Aji wana haya, snaw Truku o ini bi kengungu ni ini bi keisug uri ni mkla bi smalu lala klgan dangar.

Saw kuyuh Truku do tgseesu bi ni mmlux lnglungan dha. Manu saw kiya ni mkla balay qnuqih ni tmwaray, sluun dha qabang ni lukus Truku djiyun sapah. Nasi ini sluhay saw nii ka kuyuh Truku do ksngun rudan dha ni hlisun seejiq uri. Kiya ni ungat snaw Truku ka smkuxul hyaan uri. Manu saw kiya ni snaw Truku o tai saw mha mrmun bi ni mTruku o asi ka mdrumut bi smluhay ddaun laqi snaw. Kuyuh do asi ka mkla balay tminun ni kika balay bi kuyuh Truku ksun. Kiya ni gaga ptasan dqras ka seejiq Truku ksun o mgkala rmun duri. Yasa saw nii muda o pgkla sun qnsejiqan ni ssTruku bi ska alang. Risaw Truku sbiyaw o asi ka mrmun bi ni ini keisug ana manu dhuq mangal tunux pais. Laqi kuyuh do asi ka mkla bi mseusa ni kika srwaun drudan ni tduwa ptasan ka dqras dha. Saw ka mkla bi maduk ka snaw o kisa balay bi Truku ksun ni kuxul bi kuyuh knsyangan. Miing stmaan na ka snaw Truku o ida asi ka kuyuh niqan ptasan dqras. Mana saw kiya ni ptasan dqras o meeniq ska alang seuxal o paru bi sun knrdax.

Knsyangan ptasan dqras ka kuyuh Truku o ptasan pnglux ni dqras. Snaw Truku do ptasan pnglux ni bkluy. Pnskraya na knxalan sayang o kkdrumut ta qmeepah ni kksuyang kana lnglungan ta ita laqi Truku. Rudan Truku sbiyaw o dmudul bi rmngaw lqian. Mhuqil ka seejiq do utux na ga asi ka muda ptrima baga pusu Hakaw Utux hiya. Kiya o qulung mnangal tunux pais ka snaw ni mkla bi tminun ni miri ka kuyuh do muda ptrima baga siida. “Ras” asi ksa sriyu paah hiqur baga dha ka dara. Saw nii seejiq o pdaun na Hakaw Utux ni mowsa tblaiq mniq tuxan. “Kiya ka kiya ni nasi saw ini angal tunux pais ka snaw ni ini kla tminun ni miri ka kuyuh do ini pdai Hakaw Utux ni qdanun dha yayung truma ni uqun karang ka hiyi niya da.” Msa ka kari rudan Truku sbiyaw. Duri o rmngaw ka rudan ta sexual, “ ini tduwa ciyuun ka Hakaw Utux, yasa mha skpudung ka tluling baga da. ” msa ka kari rudan. Rudan ta sbiyaw niqan gaya smalu ddaun uuda, ini khmut, kiya ni malu nanak seejiq sun o wada malu bi kndsan dha babaw dxgal, mhuqil do muda Hakaw Utux ni mmowsa tblaiq bi tuhuy utux rudan ni mniq tuxan.