Quri ndaan huling（狗的過去）

Niqan 1 jiyax, malax nami ptasan ni mksa bilaq elug, mmowsa nami sapah ka swayi mu kuyuh Sakay siida, pklug nami qmita 1 wawa huling saw sgealu bi qtaan. Kiya ni empdalih 1 tuki ka tnegaan nami ni ida ungat seejiq ka miyah miing. Kiya do babaw nami mnhdu pprngaw ka yami do dsan nami sapah ni tbgun nami. Dhuq nami sapah siida do qmita mnan ka bubu nami ni smiling mnan, “ Yusang, Sakay, nnima ka wawa huling nii hug? ” Smiyuk ku rmngaw ka yaku, “Bubu, malax nami ptasan siida ka yami o mita nami ka huling nii ni sgealu bi qtaan. Kiya ni dalih 1 tuki ka tnegaan nami o ungat seejiq ka miyah miing hyaan. Kiya ni pprngaw nami ka Sakay da o kika dsan nami sapah ni tbgun nami nanak.” Embahang saw ni kari ka bubu nami da o wana mhulis ni ini rngaw ana manu kari. Babaw siida do dsan nami trima ni pqdalan nami nhapuy ka wawa huling nii da. Gbiyan do tluung nami ngangut sapah ni mseupu nami qmita karat ka yaku ni wawa huling mu. Kiya ni asi lu sriyu hi ka baki mu Tadaw ni tluung rmngaw, “ Tayal suyang bi ka lnglungan namu ni niqan balay gnealu, pdhuq namu tmqowli 1 wawa huling. Kiya ni Yusang, pdai ptngahan ka wawa huling nii han, kika mha niqan pnegluban namu da. ” Kiya do lmnglung ku ni asi mu ptngahan “Talug ”. Wawa huling “Talug ” nii o mqalux ni mkla bi hmrapas. Babaw do smnru uuda quri huling seuxal ka baki mu Tadaw. “Huling o mkla bi rmngaw kari seejiq seuxal ni paru bi lupung ita seejiq uri.

Qulung musa tmsamat ka tmpusu sapah da o ida smnegul ka huling ni paru bi enjyagan niya. Dhuq sapah do pprgun dha qmita ni spuan dha mkan nhapuy ni mimah ni mtaqi, aji uri o seupu hmrapas quri lqlaqi uri. Kika ksun paru balay lupung seejiqun ka huling sbiyaw. ” “Kiya ni hmuya ini kla rmngaw kari ka huling sayang da hug? ” msa ku smiling baki mu Tadaw. Mita huling mu Talug ka baki mu Tadaw do smiyuk rmngaw, “ Niqan 1 jiyax, babaw mnhdu mkan nhapuy gbiyan siida, yaa mqsuqi nmahan na sinaw ka huling do nii tluung ngangut. Kiya ni pklug balay mha trima ka kuyuh tmpusu sapah nii. Yaa hmuya ka huling nii ni tgliing bling rhngun ni gmguy mita. Ini qbsiyaq, hlayan kuyuh tmpusu sapah nii da o mangal pucing ni asi na slapi ka hma huling nii. Paah siida do ini kla rmngaw kari ka huling nii da ni bitaq sayang. ”

Mnhdu ku embahang saw nii ka ndaan huling sbiyaw do saw snkrwahun. Ana saw kiya o ida mu tduwaun bi tmquli ka Talug mu nii. Yasa dhiya o jima wada mapa ruciq dha nanak ni bitaq ini tduwa rmngaw ana 1 kari seejiq.