Qrasan Jiyax Idas

Pnyahan Wikipidiya
(Moon Cakes)

Qrasan Jiyax Idas (中秋節)

Pusu nniyah 來源 Kndadax Cyukoku ka Qrasan Jiyax Idas. Saw nii kingal rudan bi qrasan jiyax ni gaya dha sbiyaw kndusan o, ga mniq maxal rima jiyax ni mspat idas ka kawas kawas jiyax Nongri nii. Jiyax nii o uxay wana jiyax qrasan seejiq quri Tongya hiya. Ana Klwaan llingay quri saw Jipun, Yeynan, Cyuseying hiya o saw nii ka jiyax qrasan rudan dha sbiyaw uri. Qrasan Jiyax Idas o msnegun miyah ka jiyax krpuhan. Dhuq keeman do mqurug bi qtaan ka idas karac, htnay bi ka qurug hnigan niya uri. Saw balay mssli ka kingal ruwan sapah ni mseupu mqqaras ni mqdamac.

Kari hnici rudan 傳說故事 Qrasan Jiyax Idas nii o egu bi ka smnruan seejiqan, pusu balay ni klaun dha balay ka smnru kari rudan o kiya ka endaan quri

  1. “Chang-e-pen-yey”nii. Klaun ta kana saw sneruwan kari quri Kmukan hiya o , rudan bi sbiyaw siida, ya bi ga mniq mspatul kbkuy hngkawas brah na siida. Niqan ka kingal Bukung Klwaan, Howyi ka hangan niya. Seejiq nii o mkla bi smbu buji ni embbrax bi ka hiyi na ni mrmun bi ka lnglungan na uri. Nsa smbu hidaw ka endaan na ni wada na dhqun ka “smbu hidaw” saw nii paru bi euda uri. Mido seejiq babaw niya do o biqan dha kingal hangan, sun dha “Kbhug Smbu Hidaw” saw nii mlawa. Ana saw kiya ka endaan na o, kiya ni uxay malu bi ka lnglungan na ni empahung balay qtaan. Saw mkrbuk bi ni mqrinuc bi ka kndusan seejiq o asi na laxiy hiya, ini na bi qtaiy ni ungac bi ka gnalu na uri. Wana kingal euda ka lnglungan niya, saw qrasan babaw dxgal nii ni lmlung saw ini krudan ni musa knttu bsiyaw bi meudus. Mido rngagan na ka kingal msapuh, sai mangan iyu ini krudan ga Wang-mu-nyang-nyang hiya. Saw euda na nii o wada klaun qrijil niya da, Chang-e ka hangan na. Qrijil na Chang-e nii o malu bi ka lnglungan niya ni paru bi ka gnalu na seejiq uri. Klaun na ka lnglungan Howyi nii, ini bi lmlung quri seejiq
  2. klwaan na hiya, ini na sai blayaq dmudug ka quri kndusan seejiq klwaan na hiya uri, kiya ni knttu bi mqrinuc ni mkrbuk bi meudus ka seejiq . Lmlung saw nii mqrinuc bi ka kndusan seejiq do wada na guyun mkan ka iyu ini krudan ka Chang-e nii da. kiya do ini na bi klai ma saw slokah bi ka hiyi na ni wada skaya baraw karac ni asi skaya musa nniqan idas hiya da. saw nii ka snru dha hnici kari rudan bi sbiyaw “Chang-e-pen-yey”ksun. Wada skaya nniqan idas hiya, jiyax niya o saw balay ga mniq jiyax maxal rima ni mspac idas Nongri siida, mido sun dha rmngaw sa “Qrasan Jiyax Idas”da.
  3. Qrasan Jiyax Idas ni Yeyn-cu-min 原住民與中秋節 Nbahang mu kari rudan siida, ungac ka Gaya na “Qrasan Jiyax Idas” quru seejiq Truku hini. Qtaan rudan ta sbiyaw ka idas nii o, wana saw spgun dha jiyax quri kndusan dha. Saw piya idas do tduwa musa qmpahan mhuma bunga, sari, sqmu ni sukay. piya idas ka musa tmukuy masu ni piya idas ka kntuy masu. Kana quri kndusan saw musa lmiqu maduk, mniq sapah tminun, jiyax pncingan laqi qrijil ni mhuma ana manu…, egu bi ddaun seejiq o asi ka qmita idas spgun dha jiyax. Kiya ni ungac “Qrasan Jiyax Idas” saw nii ka Yeyn-cu-min, idas nii o spgun dha jiyax. Kiya ni ini pntna sbiyaw ka seejiq tnbarah sayang da, saw “Qrasan Jiyax Idas” nii o kuxul bi seejiq mssli ni mseupu muduh siyang, qmita idas ni qrasun dha ka saw jiyax nii da.


參考文獻[smmalu patas | ida npatas sspgan ka smmalu patas]

  • 白美惠. (2011). Wikipedia 維基百科 族語詞條試寫─原住民族語詞條 2011作品集. 教育部.