Pyasan tgciway Cingcing

Pyasan tgciway Cingcing （清境國小）

Gaga daya hraan hidaw Nantowseyn Jnaysyang ka pyasan tgciway Cingcing ksun, gisu sdalih bi Taycung ni Hwareyn dha seyns nii. Niqan elug Tay14 cya gaga lmihu hiya, plutuc dha ka Taycung ni Hwareyn dha seyns. Pyasan tgciway Cingcing nii ga pnhiyug hngkawas 1967 siida, pusu na balay o sphiyug na peuyas patas laqi, saw ka pnaah Cungkwo Tlu na mnsaping imin ni Jungmin. Pyasan tgciway Cingcing nii ga pneiyah Sowtingsincun, Tingyueynsincun, Jungkwangsincun, Powangsincun ni Jncang dnii klealng ka laqi meiyah meuyas patas. Pkla tru knmalu na pyasan tgciway Cingcing

Tgkingal knmalu na o “Tgkingal bowqax nniqan”

Gaga haypa 1748M ka pyasan tgciway Cingcing ksun, kiya ni mltu ka karac rbagan, msipa bi ka karac misan. Rbagan do ida hbaraw bi ka seejiq miyah rmigaw hiya,miya trbug lntan hngak karac hini, kiya ni ksun dha “Qdriqan kncilux” ka hiya. Pyasan hini ungac kiyayi pskltu nniqan(wana sapah teynnaw ka niqan), ungac kikayi skbgihur uri, mkan nhapuy o ida ini tmring uri. Saw nii malu bi nniqan ka rbagan alang Snapaw hiya.

Misan do ida msipa balay ka karac wah, lqian hini ga ini sa mskuy, ada ka luhay dha nniqan paah laqi ka hini. Nasi saw kska ka yahan na meuyas hiya do, ini tduwa skila duma ka lqian, hici o wada thjil alang breenux duri. Emptgsa hini o ida miisug hari knskuy kiya wah! Taqi keeman o asi ka smapaw teyntan kika tduwa malu tnqian keeman.

Tgdha knmalu na o “Tgkingal gnmaxan egu klgan sejiqun”

Pyasan tgciway Cingcing nii ga, laqi meuyas o hbaraw bi kleegan sejiqan. Niqan tnpusu seejiq(Seejiq balay, Bunun, Paiwan, Rukai, Thau dnii), niqan klmukan, niqan Khilang, niqan pnaah Cungkwo Tlu Yunnansng tnhjilan Kwomincnfu Minkwo hngkawas 38 ni 50 uri,ida egu bi klgan uri ka dhiya. Sayang do gisu rwahan kana ka rhngun klwaan dni, nii mstrung seejiq Taywan ka duma pnaah eseisil klwaan seejiq. Uxay uri o miyah qmeepah Taywan hini, dsan dha ka lqian na uri.Kiya ka hbaraw bi lqlaqi gaga meuyas patas pyasan tgciway hiya. Pyasan tgciway Cingcing ga ida spruun dha bi qmita ka quri sejiqun kklgan, kiya ni tgsaan dha bi ka quri knkla egu klgan sejiqun.

Tgtru knmalu na o “stgsa lqlaqi pyasan ”

Egu bi ka stgsa dha lqlaqi mniq pyasan tgciway Cingcing, saw ka mgrig grig sejiqun Cungkwo Tlu Yunnansng, ida egu ka gnegrigan dha grig da. Saw ka grig kungcyuey(Taycu), grig Hanicu, grig Icu, grig Myawcu dnii. Ida miyuk Hurus na Rahucu uri wah. Teumal nami euda dealang Snapaw hini uri, saw ka kndsan Hanicu na Cangceyieyn, saw ka kndsan Icu na Smiyan Puniq(Hwopacey) uri, saw ka kndsan Hanicu na Cangceyieyn, saw ka kndsan Icu na Smiyan Puniq(Hwopacey) uri. Ida slhayun lqlaqi hini kana ka dnii.

Duri ni embiyax ni mdrumuc bi madas lqlaqi musa sttu mksa kdgiyaq gaga baraw bi alang snapaw hiya uri, ida asi ka mnusa mksa tru Pungpung Gokang hiya ka kana mnuyas pyasan tgciway Cingcing ka lqlaqi wah! Ida mdudul bi laqi meuyas musa pspung snluhay dh aka lqlaqi Pyasan tgciway Cingcing hiya, pkegu knkla ni pkniqan pahung na meuda ana manu hici.

Pnyahan pnatas(參考資料)

詹素娥 Lituk Teymu