Pyasan tgciway Cinay(親愛國小)

Gaga mniq truma hraan hidaw Nan tow seyn Jn ay syang ka pyasan tgciway Cin ay. brah niya niqan pusu bbaraw bi yayung slaq(mtudu) muda qluli. Nniqan na o wada hari hay pa 900m ka knbaraw na, ida mnkiya balay qtaan, ida mpyasan balay tnpusu seejiq ka pyasan nii.

Pyasan tgciway Cin ay ga pnhiyug knlwaan Tanah Tunux hngkawas Caw he 12(hngkawas 1937) siida, brah bi hangan na o fan tung cyaw yi swo Plngawan ni fan tung cyaw yi swo Inago ksun. Yasa ini pntna ka alang Plngawan Tayal ni alang Inago Seejiq Truku, duri ni gaga mniq kngkingal na ddgiyaq. Klwaan ta Tanah Tunux siida, phiyugun sapah pyasan, sapah spuhan ni sapah ptasan kana ka klealang. Hici hari knlwaan dha do iyux kmdungus klwaan ka klealang seejiq tnpusu ni thjilan dha alang sayang ka Plngawan Tayal uri. Prajing bi han o pnhyugan dha alang dSmil ka sapah pyasan. Ma ka hici duri o thjilan dha gaga nniqan pyasan sayang ka sapah pyasan da. Miyah thjil Taywan ka Kwo min cungfu do wada pryuxun “ Cin ay kwo min pyasan” duri ka hangan na, manu ka Inago fan tung cyaw yi swo ga wada pryuxun Sung rin fn syaw uri da. Smnru ka rudan sbiyaw ga laqi empuyas siida, meuyas alang Daya ka laqi dciway(yabi ini dhuq10 hngkwasan), dhuq 10 ka hngkwasan dha do asi ka kndadax alang Daya stabuy muda hanabay ni musa meuyas alang Plngawan kida, ida wada meuwic bi ka laqi empatas siida. Yaasa musa qpahan ka seejiq dealang, musa meuyas ka laqi empatas ga asi ka mksa dhiyaq hari lgelug.

Dhuq min kwo hngkawas 57 duri do prajing peuda meuyas 9 hngkawas kana ka laqi empuyas da, tduwa musa meuyas kana ka laqi empuyas, asi ka qulung meuyas kana ka laqi dealang. Pniyah Wan ta fa teyn cang, alang Plngawan, alang Pulan dnii tru nniqan alang laqi ka miyah meuyas pyasan tgciway Cin ay, ida niqan egu klgan sejiqun uri ka ruwan sapah pyasan, saw ka Plngawan Tayal, Seejiq Truku, Klmukan ni khilang dnii klgan. Endaan ptqraq paru bi runu 921 ka sapah pyasan laqi tgciway Cin ay, sbgrahun phiyug sapah pyasan saw mndungus bi gaya tnealang seejiq tnpusu dxgal, wada skrayan rakaw tnpusu seejiq ka bgurah sapah pyasan sayang da, ida ini ktna ni kingal nanaq qtaan, kuxul bi yahan smlhaw kndadax eseisil alang seejiq mprigaw. Kndadax seuxal balay o kmnbiyax bi dmudu laqi empuyas smluhay quri saw knkla rdrudan sbiyaw, saw ka tminun pala, tminun rawa, brunguy ni towkan. Duri ni smluhay grig rudadn sbiyaw ni kari Ciuli Tayal ni kari Seejiq Truku, ida mnatas patas uri stgsa dha laqi empuyas. Sndhyaan dha kari Ciuli Tayal ni kari Seejiq Truku ga, musa pspung kari Nan tow seyn, uxay kiya o musa pspung kari alang brnux paru o ida mnangal malu hangan uri.