Pusu bi smiyan Truku sbiyaw Mgay Bari

Pusu bi smiyan Truku sbiyaw Mgay Bari （Mgay Bari 以前太魯閣族祭儀）

Emptukuy ni emphuma ana manu pnegalang brah na o asi ka plealay musa smapuh utux rudan han, kiya ka mha suyang bi hru na ni malu bi gnhiyi na msa ka kari rudan sbiyaw. Gaya smapuh o saw nii. Msgasut alang ga mk3 jiyax ka pnsrmalan ni spida na hraan idas ska rabi ka smapuh bbuyu hiya. Paah sapah mowsa smapuh ka Msgasut o madas kingal laqi snaw emptghuy hyaan musa,Msgasut o rngagan na ka laqi snaw kndadax mowsa siida, “Mowsa ta smapuh utux ka sayang da, iya bi squwaq ni gmlux balay”. Babaw na nii do mhing tahut ni ngalun na ka qbulit ni qhuni qada na ngangut ni braha na mtahu. (Pusu na ka nii ga tealax smudal lnglungan ni psbgurah euda), iyax jiyax musa smapuh o ini phngi ka tahut nii. Babaw na nii mutung harung gaga jiyun laqi snaw ni hmiru harung musa spuhan. Smapuh siida o dmuuy harung mhiyug kiyig ka laqi snaw nii..Madas kana ana manu ghak pnegalang, Mnhdu smapuh pnaah spuhan dhuq alang do miyah hyaan kana ka tnealang peangal ghak nadas Msgasut, yaasa klaun dha nadas Msgasut nii ka ghak o suyang bi ni mrana bi gnhiyi niya. Kiya ka kiya ni ini tduwa hmut musa tmukuy ka seejiq, asi ka plealay musa tmukuy ka Msgasut kiya ka suyang bi hru na mrana bi gnhiyi na. Nasi aji saw kiya dga, ini kmalu hru na ni naqih gnhiyi na uri, duri o tmbriun mhuqil ka seejiq, ana qbhni saw kiya uri, msa ka kari hnici rudan Truku sbiyaw.Saw nii ka kari Msgasut, “Utux tmninun ana manu! Ana nami rbangun ka isu, yaasa kana klgan ghak uqun ni pnegalang o snalu baga su kana, babaw tnukuy nami do thdagan, shdaan su, pqyuxan su, sdmlan su, sbhuran su ni pkdakil bitaq mphpah ni mghiyi kana. Brahaw misu balay Utux Tmninun! Hngkawas nii o wada nami mnduwa mangal uqun ni hiyi pnegalang paah qmpahan. Saw nii nami pslwilun mkug brah su hini sayang； ngali nami haya ni rinah emblaiq ni mqaras sunan tmdahu hangan su, smtama sunan ni smapuh  sunan isu Utux Tmninun ana manu.

“Utux Bari hakawas sayang ka kndsan nami o malu balay knlwaan su, gmhak nami o malu balay nangal nami ni mttuku balay, kksa nami bbuyu o kmalu utux, biqi kkla matas ni klwai ka lqlaqi nami, hkawas duri o sbliqi nami duri. Mhuway su balay utux bari. “gaya”ka pusu bi Kndsan Truku sbiyaw, kana ana manu qpahun o ida asi ka murug “gaya”,  kiya ka malu nuda ni emblaiq ka kndsan uri. “gaya”nii o Kari hnici rudan sbiyaw,  stgsa kdjiyax tama ni bubu quri lqian dha, smparu “GAYA”ni murug“GAYA”ka kndsan dha. “GAYA” nii o utux rudan ni utux tmninun ka pusu na.

pnyahan kari

資料來源口述耆老Yudaw Pisaw 1999