Pstrung

pstrung (婚姻)

Qqita lnglungan quri pstrung ka seejiq Truku sbiyaw o, taxa snaw ni kingal kuyuh.

Kari Todac

“Msupu mkingal ka kingal risaw mi kingal wowa u waya mstrung.” sunca kari Sediq.

Uxay wana sqrasun bay tnsapah risaw mi wowa ka mstrung, lwanan dha miyah msupu mqaras mkan pntryian kana ka Sediq alang.

Diyax mstrung ciida, pbbuway pnadas mi pnprngawan cnyukan dha ka tnsapah risaw mi wowa, muda psdhu kari brah Tuxan Baraw mi ppriyux pnskraya qqaya pnsdhuwan dha ka dhiya, kiya pkla rmngaw kari “wada namu balay bay msdungus ka yamu da” enca ka mtabu.

Babaw na msupu muyak babuy mi lhuwan dha masu ddadal mi ddangi, spuwan dha hmanguc ka blbilaq mi bbuuc bnyakan dha, ngalan dha kana ka ccamac, hlama, sinaw dnii uuqun, sqrasun dha msupu mkan dSediq alang kana ka kiya.

Muda mqaras mssriyux smblayaq rmngaw kari ka drudan mi dqbsuran, muway uyas mi rri duma ka Sediq, ddulun qbsuran muda mqaras cmiyuk muway sinaw mniyah ka msdungus.