Oda Kuxun Mu Moda

Oda Kuxun Mu Moda(我喜歡做的事）

Mesa ka bubu mu “ini ba gdema klaali ka Sabung mu nii, egu ba ka kuxul na moda, ini ku na pnllungi ani maanu. “So ka qmita nanaq patis ma trebi, cmebu tennaw. So ka kmeeki ma tminun pala. So ka smgaalu swai na mqedin ma swai na rseno, smkesik sapah ma smino uuqan tnsapah duri, mosa naq skadi dangi tthiqan na ”, kuxul mu ba moda ka kanna ooda nii. Kika mprengo ku so oda kuxul mu moda hini saya hayan.

Tgkingal kuxul mu oda we kika“qmita patis”, ani maanu ka ga spatis truma patis hiya pgkela ita seediq, smkuxul ku sluhe egu pnatis, klaun mu ka ndaan nseediq duri, qnita mu we patis tmgesa yaku “huwa mesa ka oda qmeepah ? ”, kika maha niqan so ririh na qnpahan. “Shuwa ta muudus bobo dheran ma gmaalu quri seediq mqrinuc seediq ?”, kika maha malu ba ka kndusan ta bobo dheran. Wada egu ba ka qntaan mu patis di ma, kika egu nanaq ka wada mu klaun ddaun duri di. Kika mosa ku kmbarux egu hari patis qtaaun mu klaali, ani so knuwan niqan ka ali mu de smkuxul ku mangal patis ma qtaun mu.

Tgdaha kuxul mu oda we kiya ka “kmeeki ma tminun pala”, sapah pyasan mu, niqan mptgesa yami laqi muuyas ka“kmeeki ma tminun pala”, kmeeki nami keeki rudan cbeyo, so ka siyo siyo siyo…ma oh~nay oh~nay, yaku ge Sabung Pawan, tminun nami egu pala slmeyun nami lubuy pila, lubuy patis, bunuh ma lukus duri, ndaan rudan ta cbeyo ka oda nii, niqan ba ririh na.Tdhuun riyung seediq alang icin ka tninun nami pala. Kndalax hini mkela ku egu ndaan rudan cbeyo, mkela ku kmeeki ma tminun pala duri, kiya smkuxul ku kmeeki ma tminun pala.

Tgteru kuxul mu moda oda we kika“smkesik sapah ma smino uuqun tnsapah”, yaku ka pusu ba qbsuran laqi mqedin tnsapah mu, bubu mu, peeyah ku naq slaqi tgsaan ku na“huwa mesa kmaro sapah ma smino qyqeyaq”, kika maha malu ba nniqan ka sapah kesun kuna. Asi ku ka dmayo kmaro sapah klaai, blequn mu smkesik kanna ka dheran, kragun mu ka tqiyan, hprayan, tloongan dadan ma dangi nami meyah theyaq sapah, dheran nganguc ma uyung we ssikun mu klaali duri. Blequn mu smino kanna ka pngerah ma hpuyan ppuqan, kika kndudul tmdahu ba ka tama mu, kika smkuxul ku oda “smkesik dheran ma smino ppuqan tnsapah mu”. blequn mu smkesik klaali ka sapah mu truma, ini mu bale pniqi ssudu.

Saya ga ku muuyas sapah pyasan ckceka, ani egu ka pyasun mu patis, mntena u naq hiya ini qtqeran, smkuxul ku ba qmita patis ma, suupu ku kmeeki thiqan mu muuyas ma, tminun nami duri. Asi ka qulung daun ka smkesik ma kmaro nniqan duri. Kika ani ima qmita yaku ge sgaalu ku daha bale, kesun ku daha tmdahu rmengo kini “kiya si laqi muuyas bale”, ani knuwan uxe knpriyux ka oda mu so nii.