Nunuh dapa

Nunuh dapa(牛奶榕)

Tnhnganan dha sa“nunuh dapa” ka qhuni nii, yasa urac wasaw na u niqan mbhuway biyuq so hari nunuh, uxay uri u hiyi na mntna hari nunuh dapa, kiya so nii ka hangan na.

　　Mhru ckcka mi llbu hari knrbawan lmiqu ka nunuh dapa, kika thdawan bay mi ssiyaw bbuyu, prading pncriyu ka tasul na u mbanah han, babaw na da u kiya wada thuway knpriyux msama da, hiyi na u mtumun hari mi mntna balung, mtubal ka ruwan mi nganguc na, tiping, msdhriq, msadu mi mbanah ka hiyi na.

　　Kana wamil, pusu, wasaw mi hiyi na u tduwa ngalan iyu, tduwa cyusan, hpuyun buu mi prmaxal dha muwang uri, nasi qruqun mkan ciida u, asi ka snawan ha kiya tduwa mkan da, mchiya hari uqun, uxay uri u pkmalu hiyi sediq nunuh dapa nii.

　　Wasaw, phpah mi hiyi na u, kuxul bay uqun kwkuwi, qqbhni, bbrihuc mi qqolic…dnii, encuun hari mkan ka sediq uri.uxay uri u tiping waru musa tnbalung ruwan hiyi na hiya, mpwaru ciida da u kiya miyah nanaq ngangac da.