Niqan brihan ka mkla kari Truku

Niqan brihan ka mkla kari Truku(說自己的母語是有意義的)

“Kari” ksun o nuway knkla rudan ni huway Utux. Nasi ta ini emduwai bi smluhay ni rmngaw do mha ta saw smsiqa balay brah drudan ta ni Sejiqun. 12 hngkwasan mu siida o pgklaan ku na quri endaan 1 uwa Sbnawan ka emptgsa mu , ngahan na o “Aruh”. “Pnaah laqi rbnaw siida ka Aruh nii o smkuxul bi hyaan ka payi na. Yasa mkla bi meuyas uyas ni rmngaw kari dha nanak ka uwa nii. Kiya ni wada prparu hari hngkwasan na da o wada matas ptasan tgbilaq. Siida o wada kmpriyux hari ka lnglungan na da. Yasa kska ptasan siida o ini tduwa rmngaw kari Sbnawan, ida asi ka mdui kari klwaan. Kibi saw wada na lxanun ka kari na nanak da. Pklug jiyax sngayan rbagan ni sngayan ptasan siida, wada sapah na ka Aruh. Qmita hyaan ka payi na do tayal bi qaras na ni bitaq meuyas ni rmgrig. Siida ka Aruh nii o wana mhulis ni ini rngaw ana manu kari. Ana huya msa mdui kari Sbnawan rmngaw hyaan ka payi na o wana sdui kari klwaan smiyuk hyaan ka Aruh nii.

Prajing matas brah 2 jiyax sngayan ka ptasan Aruh siida do payi na o pklug smtrung paru bi knrxan. Siida ka hngkwasan na o 88. Plwanan na ka Aruhan, jiyan na dqras ni baga rmngaw, “Suyang bi laqi laqi mu Aruh, ma su shngiyan ka rbnaw su enseuxal dhug? Siida o uyas su ni kari su ni lnglungan su o Sbnawan balay, hmuya ka sayang da, ma wada saw nii ini plngu ka kari su da. ” Embahang saw nii kari pyian ka Aruh do asi lu tmbqlit lmingis brah na. Paah hiya siida do paru balay kmpriyux ka Aruh nii da, ini na bi shngii ka kari payi na.

Sayang ka Aruh do niqan bi ngahan na quri uyas Sbnawan ni rmnisuh na kari uyas Sbnawan uri. Mnhdu ku qmbahang snruan emptgsa do asi khnuk ka lnglungan mu. Ana bi rabang ka rmun na ni qnita na. Nasi ungat gnealu paah kari payi na do yaa mha hmuya ka kndsan na dhug! Paah hini klaun mu, yaa manu ka pusu kari Truku uri. Kari Truku o aji wana nanak prngagan, pusu bi o nii pkmalan lnglungan ni knkla ni gnaalu rudan Truku ta ni Utux uri. Nasi ta kdrumut smluhay kari ta nanak, ida empniqun brihan ka kndsan ta uri, saw hgnigan kndsan Aruh. Yaku o ana ku nii matas tgska ptasan ka sayang, ida mu aji laxun ka jiyax slhayan kari Truku.

Ana ku mniq ska ptasan ni ruwan sapah, aji uri o tghuy ku mnswayi ni lupung, aji uri o wada ku matas tgparu ptasan, ida ku Truku balay ana bitaq knuwan.