Mseusa

Mseusa 織布

1.Nii tminun qabang rudan payi Truku 1984. Psmiyang knkla kndsan Truku

2. Nii o krig, ngalan waray nuqih tunun qabang.

Snaw Truku o mrmun bi, embiyax bi ni mkla bi tmgjiyal ; kuyuh Truku o mkla bi mseusa, rmabang knkla Truku ka tgmalu bi tnunan waray nuqih ka lukus, kiya uri o pusu bi pnskraya niqan bi ngahan pnseusa. Mniq saw nii kndsan llingay ka rudan kngkingal sapah Truku ga asi ka mhuma krig , yaasa kika ngalan dha pnyahan nuqih tunun dha qabang,phmaun dha tuma qdrux ka krig,qdaan dha qbulit pntuan ni sudu knragan saph, kkmalu kndkilan na, kika qthur ni lala bi nuqih na. Knxalan siida o krig ga tgkingal pusu balay pyahan dnuuy, khnu kmpraan ka dxgal pnhmaan o gisu pgkla qmbliqan sapah. Kmbragan hnigan krig o kingal tnxalun ni smka (1.5公尺), lhang qmusud nabilaq han o mgpajiq, baka sqtan do mgsaas ka lhang na da, rnabaw na o msnlala niqan papak, rnabaw na o mdka hnyigan tama baraq, bbaang na o mgkdkat niqan ubal na. Rhiq qmusug na o mhnuk bi waray na ni embhgay bi, kana nuqih o hiya ka tgmalu balay, kika pusu bi ngalan dha tunun.Krig o mtduwa sbrigun ni niqan seejiq pruway balay miyah marig.

Sbiyaw balay ka rudan Truku o mhuma nanak krig ngalun dha waray nuqih tunun dha qabang, yaasa endaan kndsan rudan Truku ka saw nii, manu kiya klaun dha balay waray nuqih krig o malu bi ngalan waray tunun,rqling bbaraw ka waray nuqih, mkray ini qstuq, lhkah ni pktleetu, malu qaya tunun qabang. Kuyuh ka mhuma krig, ini bi sruwani snaw ka mhuma krig, yaasa musa tmsamat do smtrung saw smeisug euda ni ini ksuyang hru na ka krig uri da. Rudan Truku o snbubu krig ni ghak krig 2 keelgan ka mhuma, kiya ka kiya ni snbubu mhuma ka ini biyaw mdakil. Babaw srnabaw ka bubu krig o mnegphug bi, bbaraw bi nuqih, mkray ini qstuq ni mrana bi ngalan nuqih uri; krig misan o llbu bi nuqih na ni mnegripuh bi uri.

Qngqaya Cinun o niqan Ubung, qataq, kusut, sntruma, bgiya, kikut, gikus, wahug, jisayan, cyadan, surul, bluhing, gluq walu, dowsan.

Maacinun waray ka nuqih krig o saw nii, kykuyuh o madas kamit ni gsak saan dha smkit ni smkrig ka krig, kika maanuqih, qmnuqih o maabkuwir, bkuwir do tgyaan, tnegiya do pdowsan, pndowsan do puyun dha maa niqan lhang,snagan dha mtasaw qsuya ni phdagun, psudun dha ka waray nuqih, pnusut do dgsayun, dnegsay do psaun dha ubung ni tunun da.

Patas qabang o tnunan msbalay patas , tnunan meaway patas, tnunan dowriq patas, tnunan phpah patas ni pmiri.

Tnunan lukus ga

quri lukus snaw o sla,pala, habuk,towrah ni trak.

Quri lukus kuyuh o pala ,usux, pdagit ,habuk, sla

Bukung ni kbhug o kika mtduwa mlukus towrah ni mtrak embanah trak, gaga psaan marung axa ka embanah trak nii, kingal ka marung o mnangal kingal tunux pais, niqan 2 marung o mnangal 2 tunux pais uri,saw nii nasi lala nangalan na tunux pais lala marung uri.

Niqan ka lukus hmuril, nii o wana snaw mdudul dmpgrig ka mtduwa mlukus, lukus nii o embanah ni geulan pshnang bilaq kangkang.

pnyahan kari

資料來源: 秀林鄉志 秀林鄉公所 2006