Msbgihur Paru(颱風)

Yaani kndalax naq cbeyo bale ka, msbgihur paru ka alang ta Taywang nii, melux naq pheyu sapah mtdheran truma ka, rudan miyan cbeyo denu ma dmamux tasil cneexan duri.

Maniq ka sapah mtdheran truma nii ge, skari daha dehuk teerang hari qntruma na sapah daha truma, llebu ba ka tndnamux na ma, knbaka naq ooda kingal seediq ka rhengun na, dgehing ba bais na duri. Malux so nii ppheyu daha sapah? Lngungun ta de, ye ba snkdakan daha msbgihur paru, ado ka ini knkeli mangal bgihur ka dmamux btunux han, kika uka riyung bhangun mesa, wada daan mangal bgihur paru ka sapah daha. Srnecux paru daka mrunu si, niqan kari pnsltudan kndalax rudan miyan cbeyo, srnecux paru stexan cbeyo bale sa, wada hii bungan qsiya sncingan rnecux kanna ka alang di mesa, mquri dgiyaq kesun daha, Rdeda qduriq ka kanna seediq ciida ma, egu riyung ka seediq wada ngalan rnecux paru ciida duri mesa, kika wada daha spqluli weewa daka riso de, wada qulung thei meelih ciida ka, rcilung rnecux paru kii di mesa. Mrunu ge, mneegu mgnetun ka rudan miyan cbeyo mesa kari daha, mrunu de msunu paru denu, niqan ka kingal alang kesun daha Pradu wada ngalan sunu mesa, kari nii ka srengo daha riyung. Kii naq mkela ka rudan tnalang hiya ciida si ma, tena wada kraman theruy icin ka seediq alang kii mesa, kika uka riyung seediq wada na hii ngalan mesa. Wada asi qdei ba mubung sunu ka alang Pradu kii ma, so hari mesa wano tnbugan daha ka, wada daha ini sklai madis duma di mesa.

Rudan miyan yami Seediq cbeyo we, niqan seediq mkela qmita dheran sphanan, asi ka sqbahang kari seediq so kiya ka, hhaun daha pheyu sapah nniqun. Niqan seediq mplawa quyux ma, niqan naq seediq mphetun quyux duri, niqan ka seediq mphetun bgihur duri mesa, ye kii ini daha kcugi riyung ka Msbgihur Paru. Saya de wada msetuq ka lutuc seediq so kiya di, hawan bale mesa ku naq lmngelung ka yaku. Malu ka ziday saya di, klaun daha mesa meeyah knuwan ka Msbgihur Paru nii ma, ye maadis quyux paru, mooda inu ka eluw na, sdhegan ta na kari ka sehu duri, knama psraman qsiya ma ppuqul namu mesa.

Kesun Msbgihur Paru nii ma mrunu nii peni, ani ta naq asi klai ka pusu na we, uka ta hhteran ma uka ta kkesan iya eyah, so ka knii peni, qmita ta terebi de, mkela ta mesa egu riyung ka, alang ga Msbgihur Paru ma mrunu, egu riyung ka seediq wada na desun ma wada na hii ngalun, uak ta pnklaan mesa maha inu bobo na, uka ta pnklaan mesa knhenu ka beyax na. kika lmngelung ku naq yaku we, misa bale niqan kesun daha Utux Baro ho? Ani si, snhiyan naq knkingal seediq ga muudus, bobo dheran hini ka nii, uka ta hhiran mesa niqan ma uka.

Pnyahan pnatis(參考文獻)

郭明正. (2011). Wikipedia 維基百科族語詞條試寫─原住民族語詞條 2011作品集. 教育部.