Msapuh

Msapuh 巫師

Kana ana manu ka pnyahan mgqraqil ni mnarux o yaasa smeeliq gaya rudan sbiyaw ni pksaang utux rudan ka pusu na. manu saw kiya do asi ka musa miying msapuh muda psdaran, smiling utux rudan ima ka peiyah mqraqil ni mnarux nii. Muda psdaran siida ka msapuh, dmuuy rqling uraw yaa bi 1.5cm qnhran ni yaa bi 1cm knlbu na, nii o daran sun rudan Truku, sntama ni snska tluling baga narat dmuuy daran ini pstuq rmtrut daran, mqmi ka dowriq dha “nam! nam! ” msa ga rmngaw hiya nanak, skngalun na hangan smlingan na ka utux rudan “ima ka pnieyah mqraqil ni mnarux nii hug? ” sun na.

smiling utux rudan 通靈 (問祖靈)

Nasi mlawa hangan utux rudan nii, seedal tluling narat baga na daran do utux rudan nii ka pneiyah mqraqil ni mnarux nii. nasi aji kiya o ini nak seedal baga nab ka daran uri. Duri o niqan 2 pusu na ka peiyah mqraqil ni mnarux nii, 1 o pksaang utux rudan, 2 o gneeguy seejiq ruway ka rudan dha, aji uri o mnda pksaang utux rudan seejiq ruway, kana mqraqil ni mnarux o ida pnaah saw nii msa snhiyan dha balay ka rudan Truku sbiyaw, kana ka saw ini tduwa kmluun ka mnarux  aji uri o mhuqil ga ida pnaah saw nii kana msa lmnglung rudan Truku, ini tduwa ini sai kmeaguh msapuh miyah smapuh ka saw nii.

dmuuy daran 用竹占

Muda smapuh sbiyaw ka Truku ga dmuuy daran ka empsdaran smiling utux, “nii o utux tama, utux bubu aji uri o utux lutut skwada ungat ka miyah pknarux nii hug?“bitaq smiyuk ka utux(seedal bag aka daran) , mangal daran ka empsapuh ni muda psdaran duri, smling utux saw manu ka pgsaun su hug?”babuy ,rudux, aji uri o duma hi hug?”bitaq smiyuk ka utux,seedal bag aka daran, kiya do mangal tmbgan ka msapuh ni gdraun na, meysa ssruwa seejiq ni utux meudus nii babaw dxgal.

Kiya ka kiya ni malu mapuh kiya o msapuh sun rudan Truku kiya, naqih msapuh o mhuni sun rudan Truku sbiyaw kiya.

Mhuni

msapuh o pruway muda pkmalu mnarux ni lmiwaq utux naqih ni mgay smblaiq quri sjiqun ni ini hyyhuya quri sjiqun. . ana ungat biyax kklawa mdka bukung alang, kiya ka kiya ni wana hiya ka pgkla lnglungan utux rudan, hiya nii o msapuh sun rudan Truku sbiyaw.

Mkgaaw kuyuh kana ka msapuh, msapuh nni o yaa bi ina pnaah sapah msapuh, laqi kuyuh msapuh, qulung geegun kuyuh maamsapuh do nuda na o asi ka qmlahang balay ni ini tduwa mgkala kari, ini hmut lmnglung quri naqih uri, lnglungan na o ptasaw utux na nanak, tai saw mha mnlngug muda pgkla lnglungan utux rudan.saw nii spruun bi seejiq ka pusu na.

pnyahan kari

資料來源:口述耆老Lowsi Rakaw 2000年8月 秀林鄉志2006