Mawi
Mniq alang Truku sbiyaw niqan kongal paru bi hnigan na seejiq hangan na o Mawi sun.Saw ka bgihur kari ka seejiq nii ga paah dgiyaq hini bitaq dgiyaq isil o kingal na bi qatar qmangaw, qnqahan na kana ka dgiyaq dxgal nniqan rudan Truku asi kbreenux msbalay ka dxgal na, Bruwan ni Sdagan o dapil qaqay na kana, kiya ka ni ini bi sklxi Truku, yasa paru qatar na mslikaw bi saan na gnama qmrak ka samat endupun dha. Klaun na gaga maduk samat ka Truku do musa smdalih tuqir samat, qduriq muda hiya ka naduk dha do qrapun na ni wada na uqun. Ungat ana kingal nangal dha samat ka mnaduk meuray bi da. Kiya do empprngaw kana ka seejiq, huya ta bi ksun phuqil ka paru bi seejiq Mawi nii msa empprngaw kana, ida mha niqan kingal mtduwa phuqil hyaan, msa ka prngan dha siida,lnglung balay kana han, kiya ptbngahi mtahu ququy dgiyaq ka qrari btunux, saw nii ka pnrngagan dha, kiya do niqan kingal jiyax qtaan Mawi ka hbaraw bi mrmun risaw wada steetu dgiyaq, lmnglung ka Mawi nii, meekan ta paru bi uqun duri, musa tgliingt tuqir samat ka hiya, mnhdu ptbangah qrari btunux ka mrmun bi rsrisaw, rtgun dha ka pntbangah dha ni mjiras mlawa wada do wah! wada do wah! Embahang saw paru bi jiras dha ka mrmun rsrisaw do paru bi ngaha quwaq na asi tmay quwaq ka mtalux bi qrari btunux nii,kiya do akay bi nbuyas gaga mtbowyak sqama nbuyas strutug miyah trbuq gsilung nklaan hidaw, wana 2 qaqay na ka mtqita babaw gsilung, kiya ka dxgal Ranyi ni Ritaw sayang da msa ka kari rudan Truku.
pnyahan kari
[smmalu patas | ida npatas sspgan ka smmalu patas]- 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.