Masaw Mowna

Masaw.Mowna(廖守臣) o pnaah alang Bsngan, qlhangan Bsuring, nyusan Skangki. Laqi bi siida o, yasa qrinut balay ka sapah na, musa kmpah daya kdjiyax dha tama na. Asi bitaq kmhmdu kmpah do o, kika suwa pusa ptasan tama na. kiya ka kiya ni, ana kuru balay kmpah o, ida na drumut quri saw ptasan niya. Manu kiya wada msdungu balay pntasan na da. Wada mhmdu matas ptasan tgbilaq da o, kina mkada musa ptasan tgska, bukuy do o, musa matas ptasan tgparu. Alang qlhangan Bsuring o, hiya ka tkkingal musa matas ptasan tgparu.

Matas Teywan ptasan tgparu Masaw.Mowna siida o, musa qbahang kari emptgsa李亦園 kdjiyax, paah hini do o, kuhul na matas quri saw mdaan ni gaya seejiq da. Kiya ka kiya ni, 1967-1977 hmkawas, tmisa ptasan tgska siida o, taysaw msangay do, musa balay smiling ni tgisa rudan quri saw ddaan Truku sbiyaw kdjiyax. Kiya ka kiya ni, 1977 hmkawas siida o, wada mhmdu smalu kingal patas, patas quri saw mdaan alang Truku sbiyaw. 1977 hmkawas siida, wada ataru sinkiw kojo qlhangan bsuring ka Masaw ni. Kmpah na kojo siida o, musa mksa alang Truku ni Bwada kdjiyax, ini bi daxal kuhul na, ida na musa smiling ni tgisa rudan. Kiya ni, 1984 hmkawas siida, wada smalu kingal patas duri, patas quri saw Gaya Tayal. 1984 hmkawas, hiya o ka mhhkri seejiq ni phmuk kulu. Mniq kulu siida, ida kmbiyax bi matas patas quri saw ddaan seejiq, kiya ni wada matas kingal patas saw ddaan alang Sbnawan. Paan mlatat hiya do, wada musa tmisa ptasan duri. 1997 hmkawas 3 idas, yasa kuhul balay hiya ka dhudan ptasan tgparu 李明亮，pyahan na tmisa empatas laqi. Aji wana tmisa ka kmpah na, qmquring kbrah seejiq tmpusu Teywan ni gaya dha. 1998 hmkawas, kisu smalu kingal patas da. Hangan patas ni o 《Gaya Tayal》. 1999 hmkawas 9 idas 9 jiyax, yasa naqih rumul na ni wada mhuqil da. Mhuqil na siida o 60 hmkawas ka hiya.

pnyahan kari

• 拉罕羅幸. (2011). Wikipedia 維基百科 族語詞條試寫─原住民族語詞條 2011作品集. 教育部.