Krig

krig (苧麻)

Krig o pusu balay pnhuma pnegalang kndsan kngkingal ruwan sapah Truku sbiyaw, ida asi ka mhuma nanak krig ka kngkingal ruwan sapah,yasa ana manu quri hnalig ana snaw ni ana kuyuh ga ida asi ka krig nii pniyahan smluun lukus dha.kiya o qabang, ,pala kuyuh, usux,pdagit.lukus snaw, pala snaw, towrah, towkan, kray, habuk. Manu saw kiya do o krig nii ga ini bi tduwa ungat mniq kska kndsan Truku sbiyaw. Krig nii ka maalukus ga niqan elug niya,krig nii maanuqih nii o pnda gsak ka rhiq krig rmirih na hika gasilo kika nuqih ksun, pnaah nii kana ka waray tunun.4 pusu krig o 1 snpuan, 2 snpuan o 1 pungu, 10 pungu o 1 hkus, 4 hkus o 1 knsdan, nii o mttuku tunun kingal qabang. Kuyuh Truku sbiyaw oasi ka mklaqmnuqih, yasa qmnuqih nii o kika plealay bi smmalu waray da. Kykkuyuh ka Truku ka qmnuqih o qyutun dha gupun ka pusu nuqih, babaw na do bgbagun dha baga rqling bi nuqih, pdaun dha kulaw baga smuyuk, lala ka snyukan dha thngay baga do ngalun ni maabkuwir.

Mcinun brah na o asi ka dmgsay waray jisayan hiya ka kykuyuh o bitaq mttuku tunun kingal qabang kiya do ngalun ni psaun dha ubung da.

Tminun sun o pusu balay kndsan kuyuh Truku. Maaspruun bi hnigan ka kingal kuyuh Truku ga asi ka mkla bi tminun ni pmiri, kiya mtduwa ptasan dqras uri da.

Nasi ini kla tminun o emputut sun smhangan ni ungat risaw smkuxul qmita hyaan uri. Manu saw kiya do laqi kuyuh ga paah 8 hngkwasan na do smnegul bubu na ni tgsaan na ana manu saw qqpahun kuyuh Truku mniqa sapah,kiya o mmiyak ni mmkay sapah, pusu balay o smluhay tminun.lukus kuyuh Truku sbiyaw o suyang bi qtaan, pala o niqan patas dowriq, patas dowriq nii o dowriq rudan nii kmlawa tnan ka pusu na, rudan kuyuh o mkla bi tminun ni pmiri, tnunan dha nanak ka plkusun dha.

Kana lukus kingal ruwan sapah o mnda baga dha tmninun nanak kana, qtaan ta ka lukus plkusun kuyuh o usux, habuk, pala, pdagit. Kykuyuh Truku ga tgmkla balay tminun Seejiq Tnpusu Taywan.

參考文獻

• 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.