Kntmaan sbiyaw ni kntmaan saying

Paah murug “gaya” hnici rudan knseutux sbiyaw ni knpriyux mquri kntama Utux Baraw pusu bi kndsan ka seejiq Truku. Utux ka pusu bi stmaan ana manu euda. Seejiq o pnspuan utux ni hiyi. Mhuqil o anan bitaq knuwan mswayay ka utux ni hiyi. Rahuq na nii ka seejiq ni mneudus utux sun o utux baga, utux bnuan hidawka sasaw na, malu utux. Kari Truku ka utux sun o malu utux, naqih utux, utux seejiq, utux baga, ni malu utux. Gaga spatas patas Nihung gaquri mkbaraw ni mksiyaw Truku ka utux sun dha, niqan utux malu , utux naqih ni bgihur utux. Utux sun Truku o (1) utux tmninun (utux bari sun uri), (2) utux rtudan, (3) utux nbuan hidaw ka sasaw na, (4) utux mhuni. Kana utux nii o niqan paru bi pnegluban kndsan Truku, Truku sbiyaw o ka pusu bi kntmaan dha quri utux o ungat pneysa kingal bi murug lnglungan utux, kika mqaras ni mgay smbliqan ka utux msa lmnglung. Nasi aji saw kiya tbrinah quri tuxan do mangal snahug utux kida. Asi ka powda sun kingal gaya o kiya ini dhuq dhyaan ka saang utux ni snahug. Rahuq na wada srngaw baraw nii, niqan duri ka utux sun: (1) utux empkmalu mnarux, nii o asi musa psdaran, empsdaran seejiq ka mtduwa smiling utux nii miyah pkanarux, meysa rudux hug? Meysa bubuy hug? Biqan pneysa utux do o malu ka mnarux uri da. Nii o utux pkmalu mnarux sun. (2) utux mgay bhring. (3) utux mhuni, nii o riqu bi Truku , yaasa mknarux ni phuqil uri.Kiya ka kiya ni pusu bi snhiyan pnsteutux Kiristu o “Kari utux Baraw ka Ptas Suyang, ni pnegkla Bgihur Suyang Utux Baraw.” Tai saw aji mha maaungat ka kari Truku ga, Pnrhula tdrudan Truku o miying pila hhjil dha kari Truku ka Patas Suyang, nii o paru balay ni pusu balay qpahun ka nii msa lmnglung Dmsapuh pnrhulan Truku, kiya do paah 1953 hngkawas mlawa kingal mspuh pnaah Amirika Yudaw Watan ka hangan na, ni miya dmayaw hmjil kari Truku paah kari Hiburu ni Girisiya. Yaasa ini sruwa dduuy kari ruma ka klwaan siida kiya dmuuy kari Cyukuku da, kiya o 22 pusu patas nii o wada smluun cicih ini pndka. Miya dmayaw thowlang klwaan uri. 1980 hngkawas do o smruwa dduuy patas ruma ka kwaan do kiya ka dmuuy patas ruma hmjil kari Truku. Manu saw pusu ggarang kari Truku o kska pnrhulan Truku, ni empgarang niya mtabug ni kana laqi utux Baraw. Manu saw Patas Suyang nii o aji wana kari Utux Baraw nanak, hiya o djiyun ttgsa kari hnici rudan sbiyaw uri.

參考文獻

• 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.