Kari pnsltudan ndaan qsiya paru–洪水的故事

Kari pnsltulan cbeyo, breenux paru ciida ka bobo dheran. Meniq kingal ali hmuwa lux daan rnecux paru, wano naq kesun dgiyaq Pgdiyan Seediq wada ini dai trebu qsiya rnecux. Ma seediq mneniq breenux paru kiya de, wada musa qduriq ddgiyaq hungun baro hiya.

Ciida, mgmiging mrulun riso weewa mrbuni, mngangah ssqada daha qsiya rnecux truma,ani si, ini sruwa maangal ka qsiya rnecux,scikul daha ssiyo qsiya.

Kika miging kingal mrulun knbtunuc riso ma weewa dungal ka sseediq,splukus daha lukus mdheriq, ma plpingal daha pcequl,batu ma briku. Qmita dheya kana seediq qrasun daha bale, ma spuuyas daha uyas ma stubu daha tubu, wada mquri tghunac, snegul qsiya rnecuc meelih.

Kari pnsltulan. Kingal mrulun riso daha ka weewa nii ge, kii si pnyahan nrudan tghunac nii mesa;mrengo dungal ka ridan,ddaan mapa rnecux ka bobo dheran nii ka ciida mesa,niqal kingal pai rudan wada uka beyax na qduriq musa dehuk ddgiyaq ba baro. Kiya ka sslmeyan qqhuni so asu hnyegan na (bsawan bunga) gmukan nah ii, wada bungan na qsiya rnecux truma.Ani si, bobo meelih ka qsiya rnecux de,kbberih kndalax ddgiyaq meyah alang ka sseediq ciida,qtaan daha egu ba dnngeyan na qqcurux ka pai rudan kiya mesa peni.