Emptsapuh ni empthuni
Emptsapuh ni empthuni(巫醫與黑巫)
[smmalu patas | ida npatas sspgan ka smmalu patas]
Alang sbiyaw ga ungac ka ksun “ sapah spuhan ” , saan psapuh mnarux seejiq, nasi mnarux do ida niqan ka emptsapuh narux. Manu bi ka “ emptsapuh ” ksun hug? Emptsapuh seuxal ni emptsapuh sayang ga, mtna saw iyux pkmalu narux seejiq kana. Emptsapuh sbiyaw ga niqan nanaq knkla dha ni sbgay dha iyug.
Emptsapuh seuxal o ida dqrijil ka meuda euda nii, kiya ni qulung niqan emptsapuh ka kngkingal alang, ana manu narux o pdaun smapuh do ida malu kana da. Manu ka emptsapuh seejiq ga, asi ka mrudan na hari qrijil, ida dntulan emptsapuh rudan ka uda nii.Uxay uri o sbgay na niqan knkla quri saw emptsapuh seejiq alang, uxay uri o sbgay mdrumuc nanaq smluhay seejiq alang. Kiya ka sltulan dha emptsapuh, ana mmanu narux o, ida tduwa spuhun emptsapuh nii kana. Kiya ni msapuh siida ga musa mangal tahuc puniq, mdayuc, lmabu qbulic, emsuwil dha gmaxun buwax masu uri, dsaw nii ka qyqaya ssapuh emptsapuh.
Nasi niqan mnarux ka tnsapah o, seusa dha lmawa emptsapuh, uxay uri o musa pqita narux sapah emptsapuh. Msapuh siida ttuyun ka mnarux seejiq, ana naq asi ksaraw tqian uri, uxay uri o tluung babaw gakac. Msapuh siida ka emptsapuh o, egu bi klgan ka sdurun na Utux, wada na spuun ruwan kana ka kari, speysa na pkmalu narux hiyi seejiq.
Mnhdu smapuh do mangal qbulic lbuun na ruwan wasaw qhuni, mangal bnuqir ni bsaun na babaw wasaw, ddangun babaw puniq ka wasaw. Mtalux do psaun na babaw hiyi ni tunux mnarux seejiq, tay saw musa muhul hari ka hiyi mnarux seejiq. Kiya ni dmurun pxal duri ka emptsapuh, siida ini asi rngaw ana manu kari ka emptsapuh, wana msa “ qtai ta han! ” ni wada sapah tmaga spi na. Nasi malu ka spi na ga tduwa musa malu ka narux seejiq, snhiyun balay seejiq uri ka pnspuhan.
Sbiyaw ga nasi malu ka snpuhan na do, niqan nanaq gaya dha meiyah mgay pnegalang, tninun na pala, uxay uri o tnbugan na rudux, ririh saw gnhuway na empsapuh, saw nii ka gaya seuxal.
Ida niqan ka “ empthuni ” uri, gaga pniqan ssiyaw alang. Manu ka ksun dha “ empthuni ” o, ida niqan kingal nanaq biyax niya mphuni. Mphuni siida, ida ini pqtai ana ima, kiya ni ungac seejiq ka qmnita “ mhuni ” ka empthuni. Smnru ka rudan sbiyaw o, “ empthuni ksun ga ungac laqi dha mlutuc, yasa naqih lnglungan dha ka dhiya.
Pnyahan bnatas(參考資料來源)
[smmalu patas | ida npatas sspgan ka smmalu patas]Empmatas: Lituk Teymu詹素娥