Dngiyah

Pnyahan Wikipidiya

dngiyah 客床

Smmalu sapah ka rudan Truku sbiyaw o asi angal qngqaya llingay dalih smlaan sapah hiya, musa miying saw mha malu bi smluun sapah ka qhuni, qrul ni djima. Seuxal balay o dmuuy qrul ka erut , qhuni o ngalan dha gasil ,gmbari ni kneuruh, gnabil o gtuan qhuni rqling yaa bi kingal tnxaalaun kndxan, saw nii kndxan o niqan bi qqlahang ghtur eiyah kmrmux pais ni ssbu puniq pais , djima o dmuxan dha dnamux , ungat pntyusan ka ruwan sapah, asi saw rangah ka ruwan na, mtmay ta ruwan o asi qtai kana ka srkaw tqian, qtaan ka srakaw tama nii srakaw bubu gaga pskaan rqda embbrah, gaga qayay srakaw tama ni bubu o niqan srakaw kneiyax msuwil ptqiun hiya ka laqirbnaw ni tleengan malah tahut misaw uri, ga narat ruwan sapah o niqan srakaw dngiyah sun, ssrakaw dngiyah nii o niqan ini bi pndka  djiyun srakaw ka nii, kiya o daan mtaqi lupung mniyah, aji uri o lupung saw mtneuda ni muda mkrabi sapah nii, kingal duri o lupung saw rsrisaw ni wauwa miyah mseupu mrrawa srakaw dngiyah nii kingal knmanan, smkuxul bi miyah mtaqi srakaw dngiyah nii ka risaw ni wauwa msslupung, yaasa mtduwa meemur hiya nmrapas hiya kingal rabi, kiya ka kiya ni srakaw dnngiyah nii o thngayan gaya Truku sbiyaw ini bi seeliq mkala kari ka dhiya, miisug gaya, nasi mnda kala kari ka ana ima o asi rngaw rudan dha nhari balay powda gaya, smmalu kmrut kingal babuy ka risaw ngalan na psahug rudan wauwa, nasi ini si haya do, mangal luqih ka musa bbuyu, musa dkrang uri o miisug gliqun pais ka tunux dha, aji uri o qmpah qmpahan daya uri o muda mangal luqih ni musa bbuyu ini nangal ana kingal samat uri. manu saw meemur srakaw dngiyah nii ka rsrisaw ni wauwa ga qmlahang ka lnglungan dha, aaji angal luqih kana kingal ruwan sapah dha. Kika srakaw dngiyah o thngayan Gaya pusu rudan sbiyaw.

pnyahan kari[smmalu patas | ida npatas sspgan ka smmalu patas]

資料來源: 耆老Iyuq Ciyang Iyang Taying 2015