Bnbung Seejiq

Bnbung Seejiq

Nkari pnyahan pusu rudan Seejiq o saw nii“Bnbung”,“Sbiyaw, mnniq kska dgiyaq ka kingal paru bi qhuni.Hnigan qhuni nii ga, dmka o mtna qhuni, dmka o mntna btunux.Saw kingal nanaq qtaan.Niqan kingal jiyax,sriyu paah kska qhuni hiya ka utux kingal snaw ni kingal qrijil,maa seejiq ni mstrung da.Ptucing laqi ni mrana paah hika hiyi ta seejiq bitaq sayang.Saw nii ka pnyahan pusu rudan ta”msa ka nkari rudan ta sbiyaw. rmngaw ka duma seejiq uri,“prajing bi smnalu karac ni dxgal siida, niqan kingal snaw ni qrijil ka utux sun, paah baraw ni miyah mtucing kska dgiyaq paru. Niqan ka ksun paru bi btunux babaw na, kiya ni mtgdha ka btunux nii da.Isil o mbabaw dxgal, isil o maa malu bi kingal sapah bukung. Dha utux nii o mniq kska sapah bukung ka dhiya ni thnganan dha Bnbung(kiya ka dxgal pusu rudan~Pusu Qhuni ni Pusu Btunux sun dha uri.) kiya ni mrana paah hini ka ita Seejiq da”msa. “Pusu Qhuni”nii o ga mniq lalih qsiya yayung Glu, dxgal alang Tmunan klwaan Bsuring.

Paah babaw gsilung o empusal mspac kbkuy maxal spac (28,14) mitur ka knpbaraw na. Btunux utux nanaq ka knbragan na o kingal kbkuy mitur.Knlbangan na o mataru kmxalan mitur.Mtna saw bbaraw bi kingal hnigan btunux bhgay.Mntucing paah karac baraw ni tgqi tunux dgiyaq baraw dowras. Sgnaah brah ni baang qmita o mtumun ni bhgay bi qtaan ka hnigan na. Sgnaah nklaan hidaw qmita o lmutuc dgiyaq ni gaga maa rnaaw.Quri gqiyan hidaw o dowras ka kiya. Wana bukuy na ni baang guri iril o kika msbnux ni rnaaw paru.Gaga hiya ka paru bi lhngaw mtduwa tqiyan rima hiyi seejiq, kiyig lhngaw hiya o mtduwa tqiyan maxal srangi hiyi.

Kiya ni mnsuwil mhurah mtucing paah babaw lhngaw ka btunux, uxay ka malu niqan.yuyuq na babaw o gaga hraan qhuni ni spriq. Kiyig lhbun lhngaw hiya o gaga pniqan jyujika ni malu patas Utux Baraw, pnowsa dsingxu ni seejiq smnegul seuxal. Yasa pusu pnyahan rudan Seejiq ka Bnbung nii ni hnciyan dha tmngahan. Gaya seejiq o spruun ta bi kana ka utux rdrudan ta. Sapah utux rdrudan ka nii ni tnhangan dha msa“Pusu Btunux”ni “Pusu Qhuni”. Spruun dha qmita ni nglan dha utux qmita. Ini tduwa rngagan naqih kari ni ana manu smeliq rmngaw. Asi ka mgmlux lmnglung , smparu, cseisug ni sbliqan qmita. Lhngaw utux rudan nii o ini tduwa cyuan.

Nasi cyuun ni uxay kiya o smliq rmngaw do smisug ni piyah paru bgihur,quyux ni bruwa. Uxay kiya o pknarux ni ana manu pqraqil ka saang utux rudan, musa maduk hiya ka seejiq o ida saw nii uri. Sayang do ini bhangi ka saw nii da, klmukan ka qmita btunux nii o “Btunux Bhgay”,“Btunux Kuwang-Ing”,“Btunux Mutan”sun dha tnhangan.“Bnbung”,“Pusu Btunux”“Pusu Qhuni”ksun ta tmhangan ka ita.“Pusu Qhuni”nii o pusu pnyahan rudan ta,kika nkari paah rdrudan ta sbiyaw.