Alang mu dwiyaq(Toda)

Alang mu dwiyaq(Toda)

Alang mu way dwiyaq. alang mu way siyaw bbaraw balay yayung. alang mu, niqan hbaraw sediq, niqan ou sapah uri.malu balay qtaan,malu balay nniqan uri. alang Sediq emToda ka alang mu, kiya mi niqan hbaraw bay Sediq emToda way msuupu mniq alang hini.snru ka tama mu rudan“uxay hini ka alang rudan ta cbiyaw, pniyah ta alang emToda miyah thdil alang ta hini sayang,wada niqan maspac kmxalan tru hari knkawas ka nniqan ta hini ”emca Sediq alang ta mdrumuc balay qmpah kana, yabay niqan burah dxral, kiya hmuma so ana manu miyah bay kana, saw ka Payay, wana ita huni niqan payay tbula, basaw, saw bunga, sari, lhngay, sama, ricah, bnuwan, aring, dluloq rungay, qlahi…. ida malu kana ka hru dha,miyah kana ka nhmaan uri. Kiya sayang ana ima miyah kmbaruh dxralnami hmuma beluh, tmato, ucik tbula, lnlamu so sama mi ociya,briyun dha mi pryuhun dha pila. So nii pniyah icil alang sediq way mniq alang nami sayang u wada hbaraw hari mi bsiyaq hari knkawas da. alang mu way pcka bay dwiyaq, cbiyaw uxay alang han u bbuyu ni qhuni harung kana, kiya ka sun dah“alang bbuyu harung qhuni”ka alang hini. qhuni harung u niqan dha kluwan , kingal u harung balay, kingal u harung trabus, qhuni harung balay sun malu bay stahu puniq, qhuni harung trabus u malu bay phyuun sapah, cuxal pradil thdil hini ka rudan sbiyaw u harung trabus ka wada malu bay phyuwan ssapah, ado mkray ka qhuni trabus ni phyuun sapah u ini kridil uri.

Brah alang mu niqan bbaraw bay yayung, emca ka bubu mu rudan“cbiyaw musa ku mahu yayung kddiyax, panun mu brunguy ka rutiq lukus dsun mu mahu yayung, nhdu mahu do panun mu brunguy dungan han mu phidaw nganguc sapah. nasi rbawan do, musa nami tmapaq qsiya yayung,musa nami qmraq qcurux,krarang mi bow wlung yayung uri, saw nii malu bay saan ka yayung alang mu dwiyaq. nasi qmuyux deyhing do saw bay uxay hiya da, madas rngcux ni mrutiq ka qsiya, mapa btunux mi qhuni saw hari muutux dmi ktayun na kana ka qnpahan sediq mi hakaw uri da, saw bay smicu.” alang dwiyaq sayang saan balay rmiwaw sediq pniyahh icil alang, yabay niqan nanaq malu day waya ka“sediq tnpusu Taywan”hini, niqan malu so sknxun bihur mi burah balay qsiya mahun uri. Sayang way ta embiyax smluhay kari ta nanaq mi smluhay emdaan rudan ta cbiyaw, saw ka tminun pala, tmsa rri mi uyas Sediq, niqan balay lilix dha kana. Pusu bala lnglungan kana ka sediq alang dwiyaq.