Alang Mu Dgiyaq

Pnyahan Wikipidiya
跳至導覽 跳至搜尋

Alang mu gaga dgiyaq. Alang mu gaga siyo bobo yayung. Hbaro seediq ka alang mu, egu sapah duri. Malu bale qtaan, malu bale nniqan na duri. Alang Seediq Tgdaya ka alang mu, kika hbaro ba Seediq nami yami Tgdaya gaga msuupu mniq alang hini. Rmnengo ka tama mu rudan, “uxe hini ka alang rudan ta cbeyo, pneyah ta alang Truwan meyah theruy alang hini, yaani wada niqan mmsepac kmxalan hari knkawas ka nniqan ta hini ” di mesa. Mdrumuc bale qmeepah ka seediq alang nami hini, ado bgurah ka dheran hini, kika mhuma ani maanu we malu kanna, so ka paye mdengu, wano yami hini ka meyah paye tbula ma, niqan baso, macu, bunga, sari, srqemu, sama, ricah, brkawe, bluqun, cadu, tlahi, malu bale ka hnreyan na kanna. Kiya, saya de ani ima meyah kmbarux dheran ma phmaun daha beluh, tomato, ucik, sama ma ocya, brigun daha ma pryuxun daha pila. Kika kndudun egu ka seediq pneyah uciicin meyah meniq alang nami hini saya di. Alang gaga pckaun dgiyaq ka alang nami, uxe alang cbeyo hayan, bbuyu qhuni harung kanna, kika kesun daha “alang bbuyu qhuni harung” ka alang hini. Qhuni harung niqan daha klegan , kingal we harung bale, kingal ge harung trabus, qhuni harung bale kesun malu ba sptahu puniq, qhuni harung trabus we malu ba saangal eruc sapah, prading meyah theruy hini ka rudan ta cbeyo we, harung trabus ka wada malu ba spheyu sapah, yaani wada mkere ba ka qhuni trabus nii ma msderux duri. Niqan yayung paru ka berah alang nami, mesa ka bubu mu rudan, “cbeyo mosa ku mahu yayung klaali, paanun mu bruru ka ppheyan mu saun mu mahu siyo yayung, mhedu ku mahu de paanun mu bruru dungan, saun mu mhido nganguc sapah. Rbagan de mosa nami lmanguy yayung, mosa nami qmerac qcurux, karang ma bolung yayung duri. Netun so qmuyux paru de so ba uxe heya denu, madis rnecux ma mrmusaq ka qsiya yayung, mapa btunux ma qhuni paru, daun na mnais kanna ka qnpahan seediq ma hako, so ba smiicu.” Kuxun riyung saan rmigo seediq pneyah icin ka alang dgiyaq saya, ye niqan nanaq knmalu na Gaya ka“seediq tnpusu Taywang”hini, niqan bgihur malu ba sknexan ma qsiya malu ba mahun duri. Saya, ga nami kmbeyax smluhe kari nami nanaq ma, smluhe ndaan rudan nami cbeyo, so ka tminun pala, kmeeki ma muuyas uyas Seediq, niqan bale rilih daha kanna. Pusu bale we malu lnglungan kanna ka seediq alang dgiyaq.