Uxay mu bi shngiyun seejiq(我絕不會忘記的人）

Uxay mu bi shngiyun seejiq babaw dxgal o kiya ka tama mu rudan， yasa gmalu bi knan ka tama mu rudan, mkla bi ana manu ka Tama mu rudan uri, kiya ni hiya bi ka tgkingal emptgsa knan.Tama mu rudan wada embhgay bi ka snunux niya da, saw bi huda mtasaw qtaan.Tama mu rudan niqan bbaraw bi ubal dowriq na, mtumun ni rmdax qtaan ka quru dowriq na uri, mdrumuc bi qmpah ni musa bbuyu uri,snaw bi balay qtaan ka hiya.Tama mu rudan paru bi hnigan na, ana nanaq wada mspac kmxalan ka knkawas na da o, embiyax bi ka hiyi niya na.

Pxal rmngaw knan ka tama mu“smaping siida ka tama su rudan o, mnusa qmada bakudang mspac dha tru o, kiya ni stkray bi hiyi niya bitaq sayang”.Dhuq sayang Tama mu rudan mrbu balay tutuy kdjiyax, mapa towkan ni qmiri pucing hginuk na, musa kksa qnpahan, qmita hnuma na sama,syuqun na qsiya ni balun na ka spriq gaga mhru ssiyaw sama hiya, iyuh bi kmalu kndakil nhuma na sama,tduwa spriyuhun egu hari pila sdanga na mnan, speuyas na mnan laqi.

Mnsa ka tama mu rudan“hana nhuma sama nii asi ka saw dmanga laqi rabug qmlahang, kiya ka musa malu ka kndakil dha. Paru da o tduwa brigun ni priyuhun egu pila ni spuyas nami munan, iyuh nami pkla yamu ka kngkla ana manu. kiya do musa nami mqaras balay ka yami rdrudan uri da . ”Saw nii gmealu bi tnsapah ka tama mu rudan ,hiya ka pusu nami bi rudan , hiya ka tdhuun nami bi smluhay endaan rrudan sbiyaw uri. Niqan kingal jiyax , mgrbu ku balay tutuy uri, smnegun ku bukuy tama mu rudan musa qnpahan hmaan na masu gaga dgiyaq.dhuq nami tnkuyan masu da o pklu smeriyu ka hidaw uri da, miyah smtrung mnan. Siida asi ku usa kska tkuyan masu ni bbilun mu ka gasil lmiwaq puruc “klax! klax”mhnang.wada asi skaya kana ka puruc kska tnkuyan masu hiya, qrasun mu bi ka kingal jiyax nii.

Duri ni musa ku miing pnusa dangaw qowlic Tama mu rudan ,ini qbsiyaq lmawa ku “Tama rudan, Tama rudan gaga tjiyan ka qowric da, iyah nhari ”,mqaras ku bi tmaga Tama mu rudan .“wa! tagay balay knparu ”mnsa ka Tama mu rudan .Siida tmgsa knan ka Tama mu rudan “Pihu, gaga tblaiq mkan qnpahan ka qowlic nii, rowma sun tnhangan , hiya ka pqdu mkan hnuma seejiq, kiya ka sdangaw ta.Laqi snaw o asi ka mkla pusa dangaw, kiya ka uxay pkuray ka tnsapah ta ”, Tama rudan o tgsaan ku na shuya pusa dangaw qqraq qowlic , tgsaan ku na smalu beygi uri , yahan msangay qmpah qnpahan. Saw nii ka Tama mu rudan, tdhuun mu balay, uxay mu bi shngiyun ana bitaq knuwan.