Ttsa kingal ruma sapah

Sapah ksun o pusu nniqun mi pusu bi kdkilan ta sejiq/sediq paah laqi. Nasi ungat/uka sapah do, ungat/uka bi sbliqan ta muudus babaw dxral kida. Kiya ni txtaxa ta hiyi o spruun ta qmita ni muda qmlahang ka kingal ruma sapah ta. Ttsa kingal ruma sapah o pusu ttsa ni unalu. Niqan saw truma ni ka pusu na. Qpahun ttsa tama mi bubu. Saw mha mdrumuc bi qmpah, dmanga mi qmlahang bi dmudul laqi. Embbiyax mi msblayiq bi ka sapah dha. Qpahun ttsa laqi, maakingal laqi o snparu bi rudan, mdrumuc bi smluhay matas mi qmpah, saw qrasun bi rudan ka kana euda dha. Qpahun ttsa snaw mi qrijil. Snaw mi qrijil o pdkaun ta qmita mi snbeyhin/snparu bi kana. Psbalay mi psblaiq bi msupu, ini tduwa pptraqil. Qpahun ttsa mstrung. Snaw mi qrijil o mnduwa bi muda waya pstrung mi saw sblaiq bi ka kndsan kingal msdungus. Smmalu sblaiq bi kingal ruma sapah bitaq mhuqil ini bi knpriyux. Qpahun ttsa qmlahang dnuuy. Saw mrana bi dnuuy, qeyya/qqiya mi snku ka kingal ruma sapah. Qqblaiq knudus babaw dxral. Nasi mnduwa muru muda ka ttsa kingal ruma sapah ka sejiq/sediq o mha beyhin/paru bi knmalu mi niqan bi pusu ka kndsan na.