Ttgsa kingal ruwan sapah

Sapah ksun o pusu nniqun ni pusu bi kdkilan ta seejiq paah laqi. Nasi ungat sapah do ungac/ungat bi sbliqan ta muudus babaw dxgal da. Kiya ni txtaxa ta hiyi o spruun ta qmita ni muda qmlahang ka kingal ruwan sapah ta. Ttgsa kingal ruwan sapah o niqan mataru klgan ka pusu ttgsa na. Tg1 o qpahun ttgsa tama ni bubu, saw mha mdrumuc/ mdrumut bi qmpah, dmanga ni qmlahang bi dmudul laqi. Embbiyax ni msblaiq bi ka sapah dha. Tg2 o qpahun ttgsa laqi. Maa kingal laqi o snparu bi rudan, mdrumuc/ mdrumut bi smluhay matas ni pmpas, saw sqrasun bi rudan ka kana euda dha. Tg3 o qpahun ttgsa snaw ni qrijil/kuyuh. Snaw ni qrijil/kuyuh o pdkaun ta qmita ni spruun bi kana, psbalay ni psblaiq bi mseupu. Ini tduwa pptraqil. Tg4 o qpahun ttgsa mstrung. Snaw ni qrijil/kuyuh o mnduwa bi muda gaya pstrung ni saw sblaiq bi ka kndsan kingal msdungus. Smemalu sblaiq bi kingal ruwan sapah bitaq mhuqil ini bi knpriyux. Tg5 o qpahun ttgsa pnluban knsjiqan ta.txtaxa ta hiyi o enduwa ta bi emppgealu ni mdddayaw, ppsblaiq bi kana ka kingal ruwan sapah, tama ni bubu ni mnswai. Kana lplupung/ddangi, mdudul…saw mha malu ni msblaiq ta bi kana. Tg6 o qpahun ttgsa qmlahang dnuwi. Saw mrana bi dnuuy, qaya ni snku ka kingal ruwan sapah, qqblaiq knudus babaw dxgal. Nasi mnduwa murug muda ka ttgsa kingal ruwan sapah ka seejiq o mha paru bi knsyangan ni niqan bi pusu ka kndsan na.