Truwan na Seejiq

Ita Seejiq sun, sbiyaw balay o kingal ta rudan, niqan ta tru mswayi, niqan ta tru alang Truwan uri, saw ka alang Toda, alang Truku ni alang Tgdaya. Yasa uka patas ka bnatas quri ita Seejiq, kiya ka wada msrahuq duma ka kari ni endaan rudan ta sbiyaw. Yasa wada bsiyaq balay ka pnswayay ta nniqan ta sbiyaw da, wada niqan cicih ini pggaaluk ka hngak kari ta da, niqan ka kari ini pntna balay uri. Ananaq saw kiya ga, nasi ta spaah hangan alang ta ita nSeejiq ni lnglungun ta o, slayun ta cicih ka knkla ta pusu endaan rudan ta, saw alang Truwan, alang Ruku ni alang Rukdadaya. Dha ka alang ksun Truwan ga mniq alang ta ita Seejiq, kingal o ga alang nTruku, Truku Truwan ksun dha, kingal o ga alang nTgdaya, Truwan Tgdaya ksun dha. Barah uka alang ksun Truwan ka nToda hug ? Gisu ta ini klayi ka kiya da, ana nanaq niqan kari dha msa alang Bngbung o, ririh dha alang Truwan ka nToda o , ini pndungus mskingal ka kari dha.

Niqan ka “Alang Truwan” srngaw mu hini sayang o, quri saw alang “Truwan Tgdaya”. Mnsa ka kari tnegsaan rdrudan ta Tgdaya sbiyaw, “mneniq ta alang Truwan kana ka ita ksun Seejiq sbiyaw”mnsa, pusu ta balay rudan ita Seejiq ga, pnspruq ta “Pusu Qhuni, wada knttu mrana ka knhbragan seejiq do, thjil thjil ni miyah dhuq Truwan da” mnsa. Rmngaw ka rdrudan sbiyaw Truwan Tgdaya ga, niqan mngari alang nniqan rudan ta sbiyaw, yabi wada niqan na, ga dha ini klayi duma da” mnsa. Snpgan dha o, niqan alang ksun Truwan, alang Knuguh, Ruku, Rukudaya, Skikun, Tasaw, Brenux, Sipaw ni alang Ayug. Ya alang Truwan ka pusu balay pnlayan dha tnlangan, kika asi dha gxali mnsa Truwan ka dxgal quri hiya da. Ana bitaq sayang, saw smneru ndaan rudan ta sbiyaw ka rdrudan ta Tgdaya ga, spiyah dha Truwan hini ka pusu kari ndaan rudan ta sbiyaw ni kari ksun dha “Psahu” ka srngaw dha balay.

Ya ima ka mniyah Psahu alang Truwan hiya siida, yabi klmukan mnsa duma, yabi klug mnsa ka duma dha, ini snleesi mkla. Saun dha gmqi xiluy ka pusu qsiya mmahun seejiq Truwan hiya, sgragan ka xiluy kiya do, mnarux kana ka seejiq mnimah qsiya sngragan kiya mnsa, mllabu embuyas ni tbrihun dha ka nuqan dha idaw, ana spuhun empsapuh o ini bi kmalu. Kiya siida, wada tggarang ka rudan ta mnniq Truwan hiya duri. Saw nii ka kari snnruwan dha. Yabi qndadax hiya siida musa tmalang alang Gungu, alang Qacuq, Suku, Paran, Tganan, Tongan, Sipaw, Drowdux, Mhbu ni alang Buwarung …. Gaga hiya ka alang Pradu ni alang Bkasan uri, wada seupu musa mniq Buwarung ka dhiya da. Balay bi o, seejiq nToda ka dhiya, nii miyah tuumal Gaya ta ita seejiq Tgdaya da. kika yahan ta na qmlahang Tanah Tunux do, maxal dha alang ka snpgan dha alang Seejiq Tgdaya.

Duri Niqan kingal kari sneru dha, quri ksun “Damay Dowriq”, duma rudan mnsa “mniyah dhuk alang Truwan ka dha Damay Dowriq sbiyaw” ,ni duma o“kingal bi ka mniyah” mnsa. Miyah gmarang kari Utux Baraw ka Damay Dowriq ni tmgsa hmanguc qbulic ni smalu puniq uri msa.Siida kuxul balay saan sluhay rsnaw ka hmanguc qbulic ni smalu puniq, qrijil ni llaqi o musa emsuwil embahang kari Utux Baraw. Bitaq sayang wada ta qbhangan ni qtaan hbaraw bi niqan bi gealu dha ka “Damay Dowriq”sun.Dhiya ni tadhuun balay seejiq babaw dxgal sayang.