Tnhjilan alang Seejiq Balay (賽德克族的遷徙史)

“ Seejiq Balay” ksun ga ida niqan tru klgan kari, saw ka Sediq Toda, Seejiq Truku ni Seediq Tgdaya. Sbiyaw han o ida mnniq daya pusu yayung Mtudu kana, kndadax alang Paran bitaq alang Truku, ida nniqan Seejiq kana.

Ini iyah qmlahang Taywan ka Tanah Tunux han o, alang Seejiq ksun ga yabi wada hari dhuq kingal kbkuy spgan wah! Yabi wada hmrinas egu spgan uri wah! Ana naq ini ktna hari ka hnang kari o, ida mtduwa pprngaw. Ida niqan ka ini ktna pusu kari uri, ana saw kiya o tduwa mpprngaw wah!

Smnru ka rdrudan alang o, “ Gaga mniq hnruan hidaw Kareynko hiya duma ka dadan ta wah! Yasa kndadax alang hini wada thjil hiya ka dhiya” msa, yabi wada hari spac bitaq rima kbkuy hngkawas da ka tnhjilan dha da. Yasa wada bsiyaq tnhjilan dha dni maku ini klai kana ka mtduwa bi jiyax da.

Yasa wada bsiyaq balay ka pnswayan da, manu ka sayang do wada ta mangal hangan “ Truku ni Seejiq ” dha klgan da, kiya do saw ta bi ungac pnegluban ka ita sayang da. Klwaan sayang uxay uri o eseisil klwaan o, psgenakun ta dha qmita ka “ Truku ni Seejiq ” ksun, balay bi o kingal lutuc rudan ta ka ita.

Yahan ta qmlahang Tanah Tunux do, ada ka knsiyuk kklwaan Tanah Tunux ka drudan ta, kiya ni ana nanaq saw pusu alang Nan-tow, ana nanaq saw alang tnhjilan hruan hidaw Hwa-reyn o, ida tnhjilan Tanah Tunux kana ka nniqan alang drudan ta seuxal, bitaq bi yahan smriyux qmlahang Tlu nii sayang.

Seejiq ksun ga uxay wana pusu alang hini ka ga nniqan Seejiq, manu ka hnruan hidaw Hwa-reyn niYi-ran o, ida niqan alang nSeejiq uri wah! Kana do yabi wada hari niqan empusal ka alang nSeejiq ksun. Saw ka gaga tgimax mniq alang seejiq Truku ni Amis hnruan hidaw “ Hwa-reyn ” duma, gaga tgimax mniq alang Tayal Yi-ran hiya duma uri, kiya ni laqi snduray do wada ini kla msa tnSeejiq ka pusu rudan dha sayang da. Sayang do ada ka mneuyas patas, ada ka snqpahun, ada ka mstrung, wada mkrinah kghak teginu alang ka ita Seejiq da. Ini saw Seuxal asi tnkingal alang mniq da, ida hbaraw bi ka wada tgeimax mniq eseisil alang wah! Ana nanaq saw kiya o ini ta shngii ka pusu pnyahan ta, ini ta shubgi “Seejiq ku inu ka yaku” do kika malu da.

Pnyahan bnatas(參考來源)

Empmatas: Lituk Teymu(詹素娥)

Jiyax：2024/04/05