Tang-s-ceng

Tang-s-ceng(唐氏症)

Hmnuya ni piya Tang-s-ceng ka Tang-s-ceng?

Seuxal ga ida thnganan Meng-ku-ceng (蒙古症) uri ka Tang-s-ceng ksun ( yasa leexan shruyun kika ini si haya tmhangan da ). Pusu bi o ida hngkwasan mshjil qrijil, wada suqi paru hngkwasan da kika tnegknbkiyan mtucing laqi Tang-s-ceng o ida pkeegu hari uri, saw ka hmrinas 35 na mshjil qrijil. Nasi ini pseanak hnkwasan o tnegknbkiyan tucing laqi Tang-s-ceng ga yabi 1/700~1/800.

Tang-s-ceng ga ungac brahan sdakar brah, wana nanaq mshjil do musa pkmuruy sapah spuhan kika pkla. Mtucing laqi Tang-s-ceng ga ida qmita tnegknbkiyan, uxay ka lutuc narux. Kiya ka kiya ni nasi taxa dha o niqan kingal nanaq ka jan-se-ti (染色體) do, tnegknbkiyan mtucing laqi Tang-s-ceng o ida peegu hari kida. Saw ka nasi mlutuc tucing 2-3 kingal nanaq laqi o, tama ni bubu ga yabi kingal nanaq ka jan-se-ti dha, bukuy na o yabi ptucing Tang-s-ceng na laqi duri.

Meenu qtaan ka hniyagan Tang-s-seng hug?

Tang-s-ceng na laqi ga yasa ini dungus mdakil ka buuc muhing na, kika mqapi hari qtaan ka muhing, dqras na, msdhiyaq ka dha dowriq, ini kdungus qtaan uxay uri o mquri nganguc qmita ka dowriq, ciway ka bkluy, llabang ka pnglux. Duri ni ruwan quwaq ga suqi ciway ida paru ka hma, leexan bi ini teula qbhangun ka kari. Duri ni teura bi ka ayus qapal baga, llbu ka hniygan, qthur ka hiyi, llabang ka keiyax wawa qaqay, putuh ka tduling baga, pungu buuc o ini hari ksdhug.

Mneenu ka narux Tang-s-ceng?

Tang-s-ceng laqi ga lxanan bi snegulun thuway mkla, slukah bitaq ska kndkaran knklaan, nkiya naq narux tama baraq dnii klgan. Ida peegu hari ka niqan narux dara uri, duma o leexan niqan buuc, qmbahang birac, biqir dnii klgan uri.

Dhuq piya kneudus na ka Tang-s-ceng hug?

Kana ka Tang-s-ceng laqi ga tduwa meudus hmrinas 60 ka hngkwasan dha, pusu bi o msealuk dha qnlhangan. Saw ka mneuyas patas, slukah bitaq ska kndkaran knklaan na Tang-s-ceng laqi ga ida tduwa niqan ka mkla qmeepah uri; nasi saw shjil ka kndkaran knklaan, knklaan na o msangay dhuq 5 hngkwasan, muda klaan o ida srahuq paru hari kida endaan.

Qtaan patas bnatas (參考資料)

Embnatas patas (撰文者)：Lituk Teymu (詹素娥)

Embatas (編輯者)：Kumu Basaw (谷慕‧巴紹)