Tama mu rudan(baki mu)

Embahang ku hnang yupan bgihur ka rhngun siida o mtna(mdka) saw tama mu rudan(baki mu)gaga mtmay ruwan sapah. Paru bi ka hiyi na ni mlukus pala ni pswiwil pala embanah bitaq pungun ni mapa towkan ni hmabuk pucing ka hginuk na ni ptasan ka dqras na uri. Murug saw knsaan na ka tama mu rudan (baki mu) ni hnang tntukan lubuy tbaku ni pucing na o mtna(mdka) saw hnang uyas malu bi bhangan. Paah bi kska lnglungan mu mqaras ku balay. Ana musa ana inu ka tama mu rudan(baki mu) o smkuxul ku bi smnegul hyaan. Ana musa yayung ni dgiyaq, ana musa qmpah, kuxul ku na bi madas knan kdjiyax uri. Ini qpah ni msangay siida ka tama mu rudan(baki mu) o tluung plahan hiya ni mangal dnngaan tbaku ni pgriqun na ni tkmuun na ka tbaku ni prmuxun na ruwan puqan na ni ptungan na ni tqrngul. Mkan tbaku ni poq! poq! msa hnang na mkan tbaku da. Qrngul tbaku niya o mtna(mdka) saw qurug mqurug knhuway skiya musa baraw ni baga na o ini bi pstuq smuyuk gasil babaw btriq na.