Sprui qmita ka drudan ta

Seejiq Truku o ida smparu bi qmita drudan paah sexual, ini bi hmut qmangaw kari rudan uri. Sbliqun na ka rudan ni spruun na uri. Quri sun ka dnurun kari rudan o, ana saw msriqu bi ni mqraqil bi o ida na dhqun bi muda, ini bi hmtan malax. Manu saw kiya do dhuq mangal mnsnhiyi ni qmbliqan rudan ka seejiq o asi ka smparu qmita drudan na ni kika mttuku bi kndsan na meeniq babaw dxgal hini. Nasi ini smparu qmita drudan na ni smparu qmita hiya nanak ni bitaq wada qmada rudan dha ka seejiq o aji sbliqun drudan dha. Aji uri o mha rndah rbagun drudan dha ni bitaq lqlaqi dha. Pklug bi wauwa ka Agil o wada sjiqun snaw ni mtucing 5 laqi. Snaw na o asaw mpdanga kingal ruwan sapah ni ungat na bi klaan asi ka musa alang paru miing qpahun, kiya ni ini hari eniq sapah ka hiya. Manu saw kiya do Agil ka tmpusu sapah ni naa hiya ka kmlawa laqi na ni qmlahang qmita drudan na sapah hki. Kiya ni Agil nii o psparu balay. Wana hiya nanak ka klaun na ni ini na sprui qmita ka rudan na ni kana ddaun sapah. Mahu lukus ni mhapuy uqun laqi o sqliyun na rudan na kana. Asaw mqsuqi tnbyaxan na qmpah ka rudan na do ini qbsiyaq wada mnarux da. Agil o ida nkiya na ni ana mnarux ka rudan na o ini na mdwai kmlawa uri. Kana euda Agil nii o qtaan laqi niya ni pskuan dha lnglungan kana. Ini qbsiyaq, payi Agil ni snaw na o yasa mshjil mnarux bsiyaq do wada msnegul msangay da. Laqi Agil o mdakil ni paru kana da ni Agil o wada rudan uri da. Mdka hyaan seuxal ka laqi niya, ini smparu qmita rudan dha ni ini klawa rudan dha uri. Kana qngqaya sapah ni dxgal sapah o wada brigan laqi na kana, bitaq dhuq malax Agil kana ka lqian niya. Thici da o sngari Agil nanak ka sgealu bi meeniq sapah hiya. Kiya ni kska alang hiya uri o ana ima mkla Peydang, hiya o smparu bi qmita drudan niya ni ana knhbragan laqi ka dngaun na o ini bi alax rudan na. Dwaun na bi kmlawa ni murug balay tnegsa rudan na. Mgrbu kdjiyax o mtqnay dha kuyuh na ni peapa tdruy kacing ni knhuway bi musa qpahan dha. Ana khnu kntlxan ka hidaw rbagan o ida mtbiyax bi mhuma bunga ni sqmu ni trabus ni kana ana manu pnegalang. Mtbiyax qmpah ni mskeeman balay musa sapah ka Peydang nii. Ini ksa “ wix ” meuwit ni rinah mqaras bi mdrumut qmpah. Yasa mkla ka Peydang, “ nii ta smparu qmita rudan ta ni mlkuh ruwan sapah o nirih ta stgsa laqi ta nanak uri.” Knkla kndsan na babaw dxgal hini ka drudan o aji ta dhuq sngqlingun rmngaw. Ida ta asi ka embahang ni sprui qmita ka rudan ta, kika tduwa dmudul mnan muda elug rmdax. Glui ka rudan ta ni kika mha paru bi qmbliqan ta.