Skhjilan ka qrijil siida(懷孕)

Kndusan Seejiq ksun ga,ana nanaq saw txtaxa seejiq, uxay uri o pnrahul seejiq, ida mgaya kana ka tnealang.Nasi saw ini peurug gaya do, ida pseeliq kndusan txtaxa ni tnsapah,dhuq kana ka klealang. Kiya ni, seejiq klealang ga ida ungac ana ima ka ini peurug gaya,kska nii tnsapah o ida smparu balay qmita gaya mstrung ka rsrisaw ni wauwa. 62

Ida pgyaun balay ka mshmadan, kika uxay psruun utux hici ka kndusan.

Rdrudan ida ini sruwa meeguy musa matas mseupu hangan ka risaw ni wauwa, naqih dha ka ini uda gaya mstrung do skhjilan da. Nasi skhjilan ka uwa do tnsapah snaw ga asi ka muda gaya mstrung kika mangal qrijil.Manu ka tnsapah qrijil o msiqa bi ka ddadal ni llupung, asi ka smipaq babuy gmdara smahug,wauwa nii o ida sqitun kana ka sneunux niya.

Kndusan qrijil ga, qulung muda mstrung, skhjilan, tmquli laqi, tmhangan, lmihug birac, ptasan dqras, mdakil dhuq mnhdu kndusan dnii glang. Kiya ni kndusan kngkingal qrijil ga, kngkingal glang kndusan o ida niqan nanaq uuda dha gaya. Quri saw skhjilan ka qrijil do niqan mnmanu gygaya hug?

Rdrudan alang ga ida ini alax rmngaw wauwa “ Nasi su qmita pncingan seeiq ska elug nuqih o, iya bi dsi sapah nnaku msa. Ngalun su do, skhjilan su bukuy do bkiyun nuqih ruwan nbuyas ka laqi da, musa mqriqu mtucing nganguc ka laqi. ” Kiya ni nasi qmita nuqih pncingan dha ska elug, ida dha ngalun ni pqyaun dha babaw sida qhuni. Nasi smlay pncingan nuqih ka seejiq do, ida musa mqaras bi ni sluun na musa malu utux ka smnlay nuqih seejiq.

Duri ni, skpahung siida ka qrijil, nasi mtutuy tnqian dni musa mtaqi dungan. Nasi ini tkmu kabang ni kmaraw tnqian do , tmlaqi siida, ptqriun iraq puga nbuyus ka laqi da.

Ida srngaw bi bubu skpahung wauwa ka kari nii, pusu bi kari nii o mririh saw iya kbsrux ni kdrumuc msa.