Seediq Uka Mu Ba Chngiyan

Seediq Uka Mu Ba Chngiyan

Seediq uka mu bale chngiyan bobo dheran nii we tama mu rudan. Anu ka sgaalu ku na riyung ka tama mu rudan, ani maanu ka klaun na duri, irih so heya ka mptgesa mu mnugaya bale. Wada mbhege bale ka snuunux na tama mu rudan di, so ba huda mtaso qtaan. Bbaro ba ka uban na doriq tama mu rudan, mtumun ma lmedax qtaan ka gagi na dowriq duri, mdrumuc ba qmeepah ma mosa lmiqu duri, rseno ba bale ka heya. Paru ba hnyegan na tama mu rudan, ani naq wada mmsepac kmxalan ka knkawas na di we, mbeyax bale ka hei na dungan. Rmengo yaku ka tama mu texal “ mosa supi ciida ka tama su rudan we, mnosa mccebu pncbuwan kesun „mmsepac daha teru‟ wa, kika mkrkere ba hei na betaq saya dungan ”. Dehuk saya, tama mu rudan mgrbu bale mtutuy klaali, mapa tokan ma smiruy slmadac hginuk na, mosa rmigo neepah, qmita sama pnhuma na, cwaqan na qsiya ma blebil speriq hmneru ssiyo sama, eyux pkdakil sama pnhuma na, ado so egu hari ka pnryuxan na pila, ddanga na yami laqi ye mesa lmngelung peni. Mesa ka tama mu rudan,“hani pnhuma ka sama nii we, asi ka so dmanga laqi rabu qmlahang mesa, kika maha malu ka kndkilan na denu. Paru de brigun ma pryuxun egu pila spuuyas mu yamu, eyux maku pgkela so patis ka bobo na. So kiya de maha nami mqaras bale ka yami rdrudan duri denu .”So nii gnaalu na tnsapah ka tama mu rudan, heya ka pusu nami ba rudan, heya ka tdhegan nami ba smluhe ndaan rudan cbeyo duri. Niqan kingal ali, mgrebu ku bale tutuy duri, smnegul ku bukuy na tama mu rudan, mosa neepah ga na phmaan macu dgiyaq baro. Dehuk nami tnkuyan na macu de, pkriyak ka hido meyah smterung yami duri di. Ciida, asi ku osa cceka macu ma bbilun mu ka negul llawa puruc, “karah! karah ”mesa mhrenang, wada asi skiya kanna ka puruc cceka tnkuyan macu hiya, qrasun mu bale ka ali nii. Ma mosa ku mqiri qapi qolic pnaha na tama mu rudan, ini qbsiyaq, “tama rudan~ tama rudan~, gaga tdiyan da qolic nii, nhari hari”, mesa ku lmawa, mqaras ku ba tmara tama mu rudan .“akedu! keyan bale knparu ”mesa ka tama mu rudan. Ciida, tmgesa yaku ka tama mu rudan“Pihu, pgeeguy kesun daha ka qolic meniq neepah ma tbleyaq mekan pnhmaan, heya ka pqhedu mekan pnhmaan seediq, kika qpiyun daha. Laqi rseno Seediq we, asi ka mkela posa qapi, kiya ka uxe pkuure tnsapah denu”. Tgsaan ku na huwa mesa qmapi qolic ka tama mu rudan ma, tgsaan ku na smalu behing duri, yahun msange meyah neepah. So nii ka tama mu rudan, tdhuun mu bale, uxe mu ba chngiyun ani betaq knuwan.